Կառավարությունից սպասում են՝ մեր տները փլուզվեն, մարդիկ մահանան, նոր տուն հատկացնե՞ն. սարիթաղցիների բողոքի ակցիան

10 տարուց ավելի է՝ մեր տների տակով ընդերքային ջրեր են գնում: Այս մասին այսօր՝ օգոստոսի 6-ին, Կառավարության շենքի դիմաց բողոքի ակցիայի ժամանակ ասացին Սարի Թաղի բնակիչները։

Նրանց խոսքով՝ տները փլուզման եզրին են, և այդ տներում 20-ից ավելի անչափահաս երեխաներ կան, այժմ Կառավարությունից աջակցություն են ակնկալում:

«Մենք նամակ ենք ցանկանում փոխանցել Կառավարության անդամներին, քանի որ ոչ ոք մեր խնդիրներին ուշադրություն չի դարձնում: Դիմել ենք քաղաքապետին, ասել է՝ ոչ մի բանով չեմ կարող օգնել, պետք է դիմեք Կառավարությանը»,- ասաց Վահրամ Ավդալյանը:

Սարիթաղցիներից մեկն էլ նշեց, որ մոտ 3 ամիս առաջ իր տան պատն է փլուզվել, որտեղ ապրում են 6 անչափահաս երեխաներ:

«Իմ ուժերով որքան հնարավոր եղավ վերանորոգել եմ, բայց չի անցել դեռ երեք ամիս նույն տեղում ճաքեր են առաջացել և հնարավոր է նորից փլուզում լինի:

Հիմա ես 6 անչափահաս երեխաներին ո՞ւր տանեմ, որ ապահով լինեն: Մի քանի անգամ վարկ եմ վերցրել, որ տունս վերանորոգեմ, սակայն ապարդյուն էր»,-ասաց քաղաքացին:

Սարիթաղցիները նշում են, որ իրենց զուգահեռ փողոցում Կառավարության 2009 թվականի N204 որոշում է եղել նույն խնդրի առկայության պատճառով 5 ընտանիքների տներ տրամադրել:

«Կառավարություը երևի սպասում է, որ մեր տներն էլ ամբողջությամբ փլուզվեն, մարդիկ մահանան, այդ ժամանակ գան օգնություն ցուցաբերեն, կամ նոր տուն հատկացնեն»,- հավելեց քաղաքացիներից մեկը:

Սարիթաղցիները նամակով դիմեցին Կառավարությանը։