Լյուբերցիում հայերի նոր ձերբակալություններ չեն գրանցվել. փաստաբան

Լյուբերցիում իրավիճակը հանդարտ է: Քաղաքի հայ եւ ադրբեջանական համայնքների միջեւ ոչ մի սրացում չի դիտվում, նոր ձերբակալություններ չկան: Այս մասին NEWS.am-ի հետ զրույցում ասաց փաստաբան Ռուբեն Կիրակոսյանը:

Նրա խոսքով՝ Լյուբերցիում ընդհանուր առմամբ ձերբակալվել էր 12 հայ, որոնցից 11-ին փաստաբանների միջամտության եւ ջանքերի շնորհիվ նախօրեին ազատ են արձակել:

«Այս անձանց ազատման գործին մասնակցել է 4 փաստաբան: Ռուսաստանում գործում է նաեւ Ռուսաստանի հայերի միությունը, սակայն նրանք կա՛մ չեն կարողացել, կա՛մ պարզապես չեն փորձել որեւէ բան ձեռնարկել: Մենք նրանց կողմից որեւիցե աջակցություն չենք ստացել»,- նշեց փաստաբանը՝ հավելելով, որ ակտիվություն եւ աջակցություն է դրսեւորել միայն քաղաքի հայ համայնքը:

Հիշեցնենք, որ ավելի վաղ Լյուբերցիում ադրբեջանցիներին պատկանող ռեստորանի վրա հարձակման կասկածանքով ձերբակալվել էր 12 հայ:

Այս միջադեպից հետո Լյուբերցիում եւ ամբողջ Մոսկվայում ոստիկանության աշխատակիցները սկսել էին կանգնեցնել հայկական համարանիշներով մեքենաները եւ հայերին ձերբակալել: Նրանց անձը պարզելուց հետո քաղաքացիներին ազատ էին արձակում: Ընդ որում՝ 15 մարդ տուգանվել է 1000-1500 ռուբլով: