Համավարակը գործիք է դարձել աշխարհում ավտորիտարիզմի վերածննդի գործում․ Մեքսիկայի նախկին նախագահ
Կորոնավիրուսի կանխարգելման գործում միջազգային համագործակցությունը ողբերգական վիճակում է, քանի որ չկա այն ընկալումը, որ անհրաժեշտ է օգնել հարեւան երկրներին, քանի որ վիրուսը տարածվում է՝ անկախ պետական սահմանների առկայությունից: Այս մասին հուլիսի 30-ին «Երիտասարդներն առաջնորդներ են դառնում» թեմայով առցանց քննարկման ժամանակ «Ավրորա» մրցանակի ընտրող հանձնաժողովի անդամ, Յելի համալսարանի գլոբալիզացիայի ուսումնասիրության կենտրոնի տնօրեն եւ Մեքսիկայի նախկին նախագահ Էռնեստո Սեդիլյոն:
«Ավելին, համավարակը գործիք է դարձել ամբողջ աշխարհում ավտորիտարիզմի վերածննդի գործում»,- ասել է նա: Ըստ նրա՝ ավտոկրատիան նոր թափ է հավաքում, եւ ամբողջ աշխարհում հստակ նկատվում են ապատեղեկատվություն մանիպուլյացիայի եւ տարածման փորձերը։
«Սակայն այսօրվա տեխնոլոգիական հնարավորությունները թույլ են տալիս հասարակություններին արդյունավետորեն դիմակայել այս միտումներին, քանի որ նրանք հնարավորություն ունեն տեղեկատվություն ստանալ այլընտրանքային աղբյուրներից»,- շեշտել է նախկին նախագահը: Էռնեստո Սեդիլյոն հավելել է, որ պետությունների շատ ղեկավարներ անտեսում են կրթության գործոնը եւ, կարծես, մոռացել են, որ 2020 թվականն է: «Որքան բարձր են կրթական հնարավորությունները, այնքան ավելի մեծ է հավանականությունը, որ հասարակության առանձին անդամներ կարող են որեւէ նոր բան առաջարկել պետությանը եւ աշխարհին: Ամեն ինչ չի սահմանափակվում միայն կրթությամբ, սակայն դաանհրաժեշտ պայման է զարգացման համար, քանի որ առանց դրա մարդկությունը չի կարողանա օգտվել այն իրավունքներից, որոնց մասին այդքան խոսվում է»,- պարզաբանել է Սեդիլյոն։
«Ավրորա» մրցանակի ընտրող հանձնաժողովի անդամ, ՄԱԿ-ի՝ մարդու իրավունքների նախկին գերագույն հանձնակատար, Իռլանդիայի նախկին նախագահ Մերի Ռոբինսոնը, իր հերթին, նշել է, որ անհրաժեշտ է ակտիվորեն ներգրավել երիտասարդներին քննարկումների եւ գործընթացների մեջ՝ միաժամանակ նրանց համար կրթական մեծ հնարավորություններ ստեղծելով: «Դա թույլ կտա շատ խնդիրներ լուծել հենց հասարակության ներսում, քանի որ նրանք ցանկացած արտաքին ուժից ավելի լավ գիտեն իրենց պետությունների խնդիրների մասին: Սակայն փոխարենը մենք տեսնում ենք, որ շատ երկրներ օգտագործում են համավարակը՝ խոսքի ազատության վրա ճնշում գործադրելու, ինչպես նա ապատեղեկատվություն տարածելու, կրթություւն ստանալու հնարավորություններն արգելափակելու համար»,- եզրափակել է նա: