Ռուբեն Հայրապետյանի նկատմամբ հետախուզումը դադարեցվել է

ՀՀ ԱԺ նախկին պատգամավոր, ՀՖՖ նախկին նախագահ Ռուբեն Հայրապետյանի նկատմամբ հետախուզումը դադարեցվել է: Այս մասին մեզ հետ զրույցում հայտնեց Ռուբեն Հայրապետյանի պաշտպան Ամրամ Մակինյանը: Պաշտպանը, սակայն, չշտապեց մանրամասներ հայտնել:

Հիշեցնենք, որ դեռևս այս տարվա մայիսին նախաքննական մարմնի կողմից հետախուզում էր հայտարարվել Ռուբեն Հայրապետյանի նկատմամբ:

Հայրապետյանը մեղադրվում է քաղաքացուն ֆիզիկական ուժեղ ցավ կամ հոգեկան ուժեղ տառապանք պատճառելու, ազատությունից ապօրինի զրկելու, ինչպես նաև ինքնիրավչության համար։ Նույն արարքների համար մեղադրվում է նաև որդին՝ Ռաֆիկ Հայրապետյանը, ևս 4 հոգի։ Դատարանը մերժել է Ռաֆիկ Հայրապետյանին կալանավորելու միջնորդությունը։

Նշենք, որ Ռուբեն Հայրապետյանը և որդին` Ռաֆիկ Հայրապետյանը մեղադրանքները չեն ընդունում:

Ռաֆիկ Հայրապետյանը AntiFake.am-ի հետ հարցազրույցում նշել է, որ դատարանը չի հաստատել այն մեղադրանքները, որ մեղսագրվում իրեն և Ռուբեն Հայրապետյանին. «Ես չեմ կարծում, որ պատշաճ է մեկնաբանել, որ մենք խուսափում ենք քննությունից։ Այս քրեական գործով ինձ փորձում են նկարագրել շատ անմարդկային կերպով, ինչ-որ մի մարդ, որը հրեշի նման փորձում է ծնողների և ընտանիքի անդամների մոտ ստորացնել։ Այդպիսի բան չի եղել, դա խեղաթյուրված է»։

«Առիթից օգտվելով, որ հայրս այստեղ չի անընդհատ փորձում են ծանուցումներ ուղարկել, որ ներկայանա քննչական մարմին և տա բացատրություն, դա ֆիզիկապես անհնար է։ Հայրս ներկայացրել է գրեթե բոլոր անհրաժեշտ բժշկական թղթերը, որպեսզի ՔԿ-ն հասկանա՝ անհնար է դա իրականացնել։ Մոտ երկուսուկես ամիս առաջ հայրս մեկնեց արտասահման՝ բուժվելու նպատակով, սակայն կորոնավիրուսով պայմանավորված` չկարողացավ վերջնական իր բուժման երկիր հասնել և մնաց Մոսկվայում։ Հայրս ուղեկցող հիվանդություններ ունի, և Մոսկվայի քաղաքապետի հրամանով այնտեղ գտնվող բոլոր մարդիկ պահեն կարանտինային ռեժիմ: Հայրս հայտնել է իր բնակության վայրը և ասել է, թե երբ կարող է վերադառնալ»:

Նշենք նաև, որ ՀՀ Վերաքննիչ դատարանը մերժել է Ռաֆիկ Հայրապետյանի նկատմամբ կալանավորումը որպես խափանման միջոց ընտրելու վերաբերյալ միջնորդությունը մերժելու մասին առաջին ատյանի դատարանի որոշման դեմ քննիչի կողմից ներկայացված բողոքը։