ԱՄՆ-ի հատուկ ներկայացուցիչը հանդիպում կունենա Աֆղանստանի նախագահի հետ

ԱՄՆ-ի հատուկ ներկայացուցիչ Զալմայ Խալիլզադը ժամանել է Քաբուլ, որտեղ նա պլանավորում է հանդիպումներ անցկացնել Աֆղանստանի նախագահ Աշրաֆ Ղանիի և Ազգային հաշտեցման բարձրագույն խորհրդի նախագահ Աբդուլլա Աբդուլլայի հետ: Այդ մասին ՌԻԱ Նովոստիին հայտնել է նախագահի պալատի մի աղբյուր:

Ավելի վաղ Աֆղանստան այցելելու Խալիլզադի պլանների մասին հայտնել էր ԱՄՆ-ի Պետդեպարտամենտը:

«Զալմայ Խալիլզադը ժամանել Է Քաբուլ և պետք է հանդիպում ունենա նախագահ Ղանիի և Ազգային հաշտեցման բարձրագույն խորհրդի նախագահ Աբդուլլա Աբդուլլայի հետ»,-հաղորդել է աղբյուրը:

Ավելի վաղ Քատարում «Թալիբան» արմատական շարժման քաղգրասենյակի ներկայացուցիչ Սուխեյլ Շահինը հայտարարել է, որ թալիբները պատրաստ են մնացած բոլոր աֆղանցի գերիներին ազատ արձակել մինչև Ղուրբան-բայրամի երեկոյան և տոնի ավարտից հետո սկսել միջաֆղանական բանակցությունները, եթե բանտարկյալների փոխանակումն ավարտվի: Ղուրբան-բայրամի զոհաբերությունների տոնն այս տարի մուսուլմանների մոտ սկսվում է հուլիսի 31-ին:

Իր կողմից Աֆղանստանի նախագահ Աշրաֆ Ղանին բանակին և իրավակարգի ուժերին կարգադրել է պահպանել եռօրյա զինադադար և խուսափել «Թալբան»-ի դեմ բոլոր գործողություններից:

Փետրվարի վերջին Քատարում տեղի ունեցած արարողությանը ԱՄՆ-ը և «Թալիբան»-ը ստորագրել են պատերազմի ավելի քան 18 տարվա ընթացքում առաջին հաշտության համաձայնագիրը, որը նախատեսում է Աֆղանստանից օտարերկրյա զորքերի դուրսբերում 14 ամսվա ընթացքում և միջաֆղանական երկխոսության սկիզբ մարտին գերիների փոխանակման գործարքից հետո: