Չինացի ցանցահենները հարձակվել են Վատիկանի համակարգչային ցանցերի վրա

Վերջին ամիսներին չինացի ցանցահեններն իրականացրել են մի քանի կիբեռհարձակումներ Վատիկանի համակարգչային ցանցերի վրա: Այս մասին հայտնել է The New York Times պարբերականը՝ վկայակոչելով ամերիկյան Recorded Future ընկերության տվյալները, որն աշխատում է կիբեռանվտանգության ոլորտում:

Պարբերականի տեղեկություններով՝ ցանցահենները, որոնք, Recorded Future-ի մասնագետների պնդմամբ, անմիջականորեն կապված են Պեկինի իշխանությունների հետ, ընթացիկ տարվա մայիսից իրականացրել են մի քանի կիբեռհարձակումներ: Նրանց թիրախում էին իբր Վատիկանի համակարգչային ցանցերը, ինչպես նաեւ Սուրբ գահի ուսումնական առաքելությունը, որը, ինչպես հստակեցնում է պարբերականը, «Հոնկոնգում դե ֆակտո ներկայացնում է Վատիկանի շահերը»:

The New York Times-ը չի նշում՝ հաջողվե՞լ է արդյոք ենթադրյալ համացանցային խարդախներին որեւիցե գաղտնի տեղեկությանը հասանելիություն ստանալ: Բայց պարբերականը ուշադրություն է դարձնում այն հանգամանքին, որ հարձակումները կատարվել են այս տարվա սեպտեմբերին նախատեսված բանակցությունների հերթական ռաունդի նախաշեմին, որոնք վարվում են Հռոմի պապի կողմից Չինաստանում եպիսկոպոսների նշանակման հարցի շուրջ:

Հռոմի պապի կողմից եպիսկոպոսների հաստատման մասին նախնական համաձայնագիրը, որոնք նախկինում նշանակվել են Չինաստանում, այսպես կոչված, հայրենասիրական կաթոլիկ եկեղեցու կողմից, կնքվել է 2018 թվականի սեպտեմբերի 22-ին: Հռոմի պապ Ֆրանցիսկոսը նշել է, որ Վատիկանի եւ Չինաստանի ներկայացուցիչների միջեւ այս հարցով բանակցությունները վարվել են 10 տարի շարունակ: Տեղական դիտորդներն այս համաձայնագիրը անվանել էին պատմական, որը ճանապարհ է բացում Սուրբ գահի ու Չինաստանին հարաբերությունների ամրապնդման համար: 2019 թվականի օգոստոսին համաձայնագրի ստորագրման պահից ի վեր առաջին անգամ Չինաստանի ղեկավարությունը հավանություն էր տվել չինական տարածքում թեմերից մեկի ղեկավարի թեկնածությանը:

Սուրբ գահը միջազգային իրավունքի միակ եվրոպական սուբյեկտն է, որն ուղիղ դիվանագիտական հարաբերություններ ունի Թայվանի հետ, ինչը հարուցում է Պեկինի դժգոհությունը: Վատիկանի եւ Չինաստանի արտաքին քաղաքականության գերատեսչությունների միջեւ շփումները յուրահատուկ բնույթ ունեն. բոլոր երկկողմ բանակցությունները վարվում են կրոնական շրջանակների պաշտոնական ներկայացուցիչների մակարդակում: Չինաստանի եւ Վատիկանի ԱԳՆ ղեկավարների առաջին պաշտոնական հանդիպումն անցկացվել է ընթացիկ տարվա փետրվարին Մյունխենում:

Չինաստանում բավականին վաղուց գոյություն ունի եպիսկոպոսների քրոնիկական դեֆիցիտ. ըստ վիճակագրության՝ 2019 թվականի դրությամբ երկրի մայրցամաքային հատվածում 98 կաթոլիկ թեմերի մեկ երրորդը եպիսկոպոս չունի: Եկեղեցական բարձրագույն հիերարխիայից շատերը պատկառելի տարիքի մարդիկ են՝ պատրաստ թոշակի անցնելու: Սա բացասաբար է անդրադառնում տաճարների գործունեության վրա: Չինաստանում կա ընդհանուր մոտ 6,5 մլն կաթոլիկ, ավելի քան 7 հազար եկեղեցական եւ Հռոմի պապի կողմից ճանաչվող շուրջ 6 հազար եկեղեցի: