Մի իրավաբանական խումբ խոստացել է օգնել եւ ասում է, որ հաղթելու եք. դիմորդների ծնողները կդիմեն ՍԴ
Ես երեկ հանդիպել եմ շատ լուրջ իրավաբանական խմբի ղեկավարի հետ, ով առաջարկեց մեր անունից այդ հարցով հայց ներկայացնի միանգամից Սահմանադրական դատարան: Այս մասին, այսօր՝ հուլիսի 24-ին, ԿԳՄՍ նախարարության դիմաց ընթացող ակցիայի ժամանակ ասաց բուհ չընդունված դիմորդների ծնողներից մեկը:
«Մարդն ուսումնասիրել է մեր ամբողջ գործունեությունը, ԳԹԿ-ի կողմից կազմակերպած քննական ամբողջ աշխատանքները եւ ասում է, որ իրավական տեսանկյունից դուք հաղթելու եք»,-ասաց նա՝ հավելելով, որ նախարարությունն ու ԳԹԿ-ն պատշաճ չեն ծանուցել համապատասխան կարգի մասին:
Դիմորդի ծնողը վստահեցրեց, որ այդ իրավաբանական խումբը խոստանում է առանց վճարի իրավաբանական աջակցություն ցուցաբերել: Նա այդպես էլ չնշեց, թե ինչ իրավաբանական խմբի մասին է խոսքը:
«Խոստանում են աջակցել, որ մենք կարողանանք վերականգնել մեր երեխաների ուսում ստանալու իրավունքը, որը ոտնահարվել է ԳԹԿ-ի կողմից: Եթե դուք ինձ լիազորում եք, ես վաղվանից կզբաղվեմ այդ աշխատանքով: Անհրաժեշտ կլինի ստորագրություններ հավաքել եւ մենք հայց կներկայացնենք ՍԴ»,-ընդգծեց նա:
Հիշեցնենք, որ արդեն մի քանի օր է, որ բուհ չընդունված դիմորդները և նրանց ծնողներն բողոքի ակցիաներ են անցկացնում: Նրանք նշում են, որ բարձր միավորներ հավաքած դիմորդները չեն ընդունվել բուհ, քանի որ առաջին հայտով լրացված բաժիններում տեղ չի եղել և չի թույլատրվել նույնիսկ մյուս հայտերով ընդունվել: Նրանց առաջարկն է տեղեր ավելացնել բարձր բալեր ստացած դիմորդների համար: