Ցանկացած լայնամաշտաբ ռազմական գործողություն Ադրբեջանի համար ծանր հետևանքներ կունենա․ Միքայել Զոլյան

Վերջին շրջանում Ալիևի վարչակարգն ու անձամբ Ալիևը անտրամաբանական հայտարարություններով են հանդես գալիս, անգամ իրենց շահերին վնասող։ Այդ շարքը շարունակում է վերջին հայտարարությունը։ Այս մասին NEWS.am-ի հետ զրույցում ասել է  ԱԺ «Իմ քայլը» խմբակցության պատգամավոր Միքայել Զոլյանը՝ անդրադառնալով Ադրբեջանի նախագահ Իլհամ Ալիևի՝ Հայաստանի իշխանություններին ուղղված «կռվեք մեզ հետ դեմ առ դեմ, տեսնենք՝ ով կհաղթի»։

«Իրոք, պարզ չէ, ինչ է ուզում դրանով ասել Ալիևը։ Եթե նկատի ունի, որ Հայաստանին ուրիշ ուժեր են օգնում, ասենք՝ Ռուսաստանն ու ՀԱՊԿ-ը, հենց իրենց քարոզչությունը պնդում էր, թե տեսեք՝ ՀԱՊԿ-ը Հայաստանին չի օգնում, հիմա ի՞նչ եք ուզում դրանով ասել։ Մեկ ընդունում եք, որ մենք մենակ ենք, հետո դուք ասում եք՝ եկեք մենակով կռվեք։ Իրականում քարոզչական իրենց միֆերի մեջ խճճվել են»,- ասաց Միքայել Զոլյանը։

Հակառակորդի հայտարարությունները կմնա՞ն հայտարարությունների մակարդակում, թե՞ սահմանին հնարավոր է կրկին լարվածություն առաջանա, իշխող ուժի պատգամավորը կարծում է, որ նախ լարվածությունը հենց այնպես չի վերանա։

«Մենք պետք է պատրաստ լինենք, հնարավոր է՝ նոր սադրանքներ լինեն։ Ինչ վերաբերում է լայնամասշտաբ պատերազմին, չեմ կարծում, որ դա շատ հավանական է, որովհետև եթե Ադրբեջանը համարեր, որ կարող է այս հարցը ուժով լուծել, նրանք այդ փորձը կանեին։ Եթե նրանք դա չեն անում, նշանակում է, որ հասկանում են, որ ի վիճակի չեն դա անել։ Այս դեպքերից հետո նրանց համար պետք է պարզ դառնա, որ ցանկացած լայնամաշտաբ ռազմական գործողություն իրենց համար ծանր հետևանքներ կունենա»,- ընդգծեց նա։

Անդրադառնալով Իլհամ Ալիևի՝ բանակցությունների ընթացքից դժգոհելուն, ԵԱՀԿ Մինսկի խումբը քննադատելուն, Միքայել Զոլյանը նշում է, որ եթե Ալիևին լսենք, ապա ամբողջ աշխարհը մեղավոր է, բացի իրենից։

«Եթե բանակցություններում որևէ առաջընթաց չկա, հենց ինքն ու իր վարչակարգն են մեղավոր, որովհետև նրանք կառուցողական չեն, իսկ հայկական կողմից կառուցողական մոտեցումներ կան։ Նրանք սկզբում փորձեցին շատ դրան չհակառակվել, բայց երբ ժամանակ անցավ, պարզ դարձավ, որ՝ ոչ, նրանց կառուցողականությունը զուտ արտաքին շղարշ էր, իրականում նրանք էլի նույն բանն են անում, ինչ որ միշտ։ Այսինքն՝ պահանջում են միակողմանի զիջումներ և այս իմաստով շատ կարևոր է, որ բոլորը՝ ԵԱՀԿ Մինսկի խումբը, Ադրբեջանը, միջազգային հանրությունը հասկանան, որ նման ձևաչափով բանակցություններ չեն լինելու»,- ընդգծեց իշխող ուժի պատգամավորը։

Սահմանին լարված օրերին հետևելով հասարակության վերաբերմունքին, Միքայել Զոլյանը նկատում է՝ արտաքին վտանգի դեպքում հասարակությունը միավորվում է։ Պատգամավորը հույս է հայտնում, որ սա երկար կտևի և այլևս զարմանալի չի թվա։

«Ծիրան տրորելը ֆրուստրացիայի արտահայտությունն էր, որ նրանք ռազմական դաշտում որևէ բանի չհասնելով, խորհրդանշական քայլեր փորձեցին իրականացնել, որ եթե հայերին վնաս չենք կարող տալ, եկեք ծիրանը, որպես Հայաստանի խորհրդանիշ, տրորենք։ Դա խոսում է այն մասին, որ իրենց կողմից այս իրավիճակն ընկալվում է որպես պարտություն, ինչպես և Ալիևի հայտարարութունները, սա ևս դրա վկայությունն է»,- ընդգծեց նա։

Միքայել Զոլյանից հետաքրքրվեցինք նաև ներքաղաքական իրավիճակով։ Մասնավորապես Սահմանադրական դատարանի թնջուկի շուրջ։ Իշխող ուժի պատգամավորը պնդում է, որ ՍԴ-ի նկատմամբ վստահություն չկա։

«Այս գործընթացի արդյունքում մենք ի վերջո կունենանք ՍԴ, որն իրոք անկախ է բոլոր քաղաքական ուժային կենտրոններից և ամենակարևորը, ունի քաղաքացիների վստահությունը։ Սա նաև դատական համակարգին է վերաբերում, որովհետև լրջագույն խնդիր է, որ այսօր դատական համակարգի վստահության խնդիր կա, ինչը նաև սոցիոլոգիական հարցումներն են ցույց տալիս»,- ասաց նա։

Միքայել Զոլյանը մտահոգություն չունի, որ հետագայում հասարակությունը իշխանությոուններին կմեղադրի, որ ՍԴ-ն իշխանությանն է ծառայում, ինչպես նախկինում։

«2018թ․-ից փոխվել է ոչ միայն իշխանությունը, այլև հասարակությունը, պետական համակարգը։ Կարծում եմ, որ ուղղակի հնարավոր չէ պատկերացնել, որ որևէ պետական մարմին՝ լինի ՍԴ-ն, ԱԺ-ն, կամ Կառավարությունը ապագայում աշխատի նույն սկզբունքով, ինչպես մինչև 2018թ․-ը։ Ժողովուրդը դա չի հանդուրժի։ Ի վերջո, մենք այստեղ գտնվում ենք հենց ժողովրդի տված քվեով, եթե 3 տարի հետո ժողովուրդը համարի, որ մեր քաղաքականությունը չի հաջողվել, նրանք ուրիշ ուժի օգտին կքվեարկեն, որն այլ քաղաքականություն կիրականացնի։ Եթե համարեն, որ մեր քաղաքականությունը ճիշտ է եղել, մեզ կքվեարկեն, մենք կշարունակենք այդ քաղաքականությունը»,- եզրափակեց նա։