Առաջիկա տասնամյակում մարդկությունը կարող է Մարս մուտք գործել․ Գարիկ Իսրայելյան
Առաջիկա տասնամյակում մարդկությունը կարող է Մարս մուտք գործել։ Այսպիս տեսակետ այսօր՝ հուլիսի 22-ին, հայտնեց STARMUS միջազգային փառատոնի համահիմնադիր, ռեժիսոր, խորհրդի անդամ Գարիկ Իսրայելյանը՝ ներկայացնելով 2021 թվականին Հայաստանում անցկացվելիք վեցերորդ STARMUS փառատոնը:
Ըստ նրա՝ առաջիկա փառատոնը Խորհրդի որոշմամբ կանցկացվի «50 տարի Մարսի վրա. Mars-3-ից եւ Mariner-9-ից մինչեւ Starship» անվան տակ: Անվանումը պատահական չէ ընտրված, քանի որ գալիք տարին պայմանականորեն կարելի է Մարսի տարի համարել:
Իսրայելյանը նշեց, որ 1971 թվականին ուղարկվել են Մարսի առաջին արհեստական արբանյակները. ԱՄՆ-ն Մարս էր ուղարկել Mariner-9-ը արբանյակը, ԽՍՀՄ-ը՝ Mars-3: Բացի այդ, Իսրայելյանը հիշեցրեց, որ մի քանի օր առաջ Արաբական Միացյալ Էմիրություններն իրենց առաջին տիեզերական զոնդն ուղարկել էին Մարս, մի քանի օրից դա մտադիր է անել Չինաստանը, իսկ մեկ շաբաթից ՝ ՆԱՍԱ-ն:
«Այլ կերպ ասած՝ այս տարի երեք առաքելություն կուղեւորվի Մարս: Դրանք բոլորը Մարս կհասնեն մինչեւ հաջորդ տարվա գարուն, ինչը նշանակում է, որ փառատոնի ժամանակ մենք բոլորովին նոր նյութեր եւ տեղեկատվություն կունենանք այս մոլորակի հետազոտությունների վերաբերյալ: Հետազոտությունների վերջին արդյունքները, կարծում եմ, պատրաստ կլինեն հենց STARMUS VI ժամանակ»,- ասաց նա:
Ինքը՝ մասնագետը վստահ է, որ առաջիկա տասնամյակում մարդկությունը կարող է մուտք գործել Մարս: Իսրայելյանը նշեց, որ իր համար կարեւոր էր փառատոնն անցկացնել հենց Հայաստանում, քանի որ նա իր կյանքի 50 տոկոսը նա անցկացրել է հենց Հայաստանում: Նա շեշտեց, որ շուտով կսկսվեն աշխատանքները փառատոնի ծրագրի շուրջ՝ խոստանալով, որ ծրագիրը բազմազան և հետաքրքիր կլինի: