Համաշխարհային տնտեսությանը սպառնում է «բոլոր ռեցեսիաների մոր» գրոհը

Համաշխարհային տնտեսությանը սպառնում է «բոլոր ռեցեսիաների մոր» գրոհը՝ կորոնավիրուսի համավարակի պատճառով տնտեսական ակտիվության լուրջ վնասը, Financial Times-ին հայտարարել է Եվրոպայի խոշորագույն ներդրումային հիմնադրամներից մեկի՝ BNP Paribas Asset Management-ի գլխավոր տնօրեն Ֆրեդերիկ Ժանբոնը, հայտնում է Forbes-ը:

Նրա խոսքերով՝ քիչ հավանական է տնտեսության, այսպես կոչված, V-աձեւ վերականգնումը, երբ կտրուկ անկմանը հաջորդում է արագ վերականգնումը: BNP Paribas-ի գնահատականով՝ տնտեսական ակտիվության նոր վերելքից առաջ կլինի վերականգնման երկար ժամանակաշրջան, եւ, հետեւաբար, տնտեսական աճի ժամանակացույցը երկրների մեծ մասում ավելի շատ նման կլինի «U» տառին:

Ժանբոնը հավելել է, որ մարտ ամսվա փլուզումից հետո ֆոնդային շուկայում կայուն աճը չի արտացոլում համաշխարհային տնտեսության իրական վիճակը: «Հսկայական ռալլին, որը մենք մի քանի ամիս տեսնում ենք մարտ ամսվա ամենացածր կետից հետո, հնարավոր է, շատ արագ է տեղի ունենում եւ հաշվի չի առնում կորոնավիրուսի երկրորդ ալիքի ռիսկը»,- ասել է նա: Նրա խոսքերով՝ ներդրողները, հատկապես ԱՄՆ-ում եւ Եվրոպայում փոքր խաղացողները, այժմ ակտիվորեն ներդրումներ են կատարում բաժնետոմսերի մեջ՝ «խաղից դուրս մնալու մտավախության» եւ առանցքային ցածր տոկոսադրույքների պատճառով, որոնք նվազեցնում են շահույթը։ Ընդ որում՝ BNP Paribas-ը խորհուրդ է տալիս ավելի շրջահայաց դիրք զբաղեցնել առաջիկա մի քանի ամիսների ընթացքում:

Ճգնաժամից հետո տնտեսության արագ վերականգնմանը շուկայի ավելի ու ավելի քիչ մասնակիցներ են հավատում: Bank of America-ի հարցումները ցույց են տվել, որ ակտիվների կառավարիչների միայն 14%-ն է ակնկալում է V-աձեւ վերականգնում, 44%-ը կանխատեսում է U-աձեւ վերականգնում: Հարցման 10 մասնակիցներից երեքը հնարավոր են համարել W-աձեւ վերականգնումը: Ավելի քան 60%-ը ասել է, որ համաշխարհային տնտեսությունն արդեն ռեցեսիայի մեջ է, իսկ 71%-ը հայտարարել է, որ ֆոնդային շուկան գերագնահատված է:

Ժանբոնը նշել է, որ տնտեսական իրավիճակի կանխատեսումը կարող է փոխել արդյունավետ պատվաստանյութի առաջացումը: Բայց վիրուսն առայժմ շարունակում է առաջընթաց ապրել, հատկապես՝ ԱՄՆ-ում, Հարավային Ամերիկայում եւ Ասիայի մասերում: «Որպեսզի վերականգնումը լինի շատ-շատ կայուն, մեզ հարկավոր է մեծ հաջողություն, որակյալ քաղաքականություն եւ տուժած երկրների բնակչության լավ վարքագիծ»,- ասել է Ժանբոնը: