Այս ամենը քաղաքական հետապնդում է. Անի Քոչարից փորձում են խլել նաև մյուս ամսագիրը

Այս ամենը քաղաքական հետապնդում է: Այս մասին Operativ.am-ի թղթակցի հետ զրույցում ասաց «Ես» ամսագրի հիմնադիր Անի Քոչարը՝ խոսելով «Ես եմ» ամսագրի մասին, որը փորձում են նրանից խլել: 

«Այն կառույցը, որի ներսում մեր գործունեությունն իրականացնում էինք և որի հետ համագործակցում էինք, իր ներսում չի հանդուրժում այլակարծություն և այլ քաղաքական հայացքներ ունեցող մարդկանց, թեև այն ամսագիրը, որը մենք հրատարակում ենք, թերևս քաղաքական չէ, ժամանցային է, բայց քանի որ ամսագրի գլխավոր խմբագիրը, այսինքն՝ ես, ունեմ քաղաքական, կամ, ավելի ճիշտ, քաղաքացիական որոշակի դիրքորոշում և ակտիվ կերպար, դա որոշ մարդկանց դուր չի գալիս: Դրա հետևանքով նրանք բոլոր հնարավոր և անհնարին միջոցներով փորձում են խոչընդոտել իմ մասնագիտական գործունեությունը, իմ մեդիաբիզնեսին վնաս հասցնել և առհասարակ ամեն կերպ անում են այնպես, որպեսզի հնարավորինս վատ լինի ինձ համար, ինչի արդյունքում բացի այն, որ իրենց հաջողվեց ինձնից խլել իմ հիմնած «Ես» ամսագիրը, որը ոչ մեկի համար գաղտնի չէ, որ իմ մտահղացած ամսագիրն է, ես ստեղծել եմ դեռ ուսանողական տարիներին, իրենք տարան, դա գրանցեցին իրենց անունով և փորձեցին ինձ վրա լիցենզիա վաճառել, այնուհետև դարարեցնել և այլն»:

Անին մեզ հետ զրույցում ասաց, որ հիմա էլ փորձում են իր ստեղծած «Ես եմ» ամսագիրը խոչընդոտել՝ տպագրությունն արգելել և նա այս ամենում, բացի քաղաքական հետապնդումից, այլ բան չի տեսնում:

Իր այդ դիրքորոշումն Անի Քոչարը բացատրեց այսպես. «Այդ ընկերությունն իրեն պատկանող որևէ թերթ և ամսագիր չի գրանցել մտավոր սեփականության գործակալությունում: Ընդամենը, տարել է իմ մտահղացած, իմ ստեղծած ամսագիրն է գրանցել և ինձ լիցենզիա է վաճառել և հետո որոշել է, որ իմ նոր ամսագիրն էլ չպետք է հրատարակեմ: Այսինքն՝ ամեն կերպ փորձում է խոչընդոտել և խնդիրներ ստեղծել: Հիմնական խնդիրը սա է, բայց կան բազմաթիվ նրբություններ, փաստաթղթերի խնդիրներ, ապօրինի շորթված գումարներ, որոնց մասին կխոսեմ վաղը՝ իմ իրավաբանի հետ»: 

Անին նշեց, որ արդեն մեկ ամիս է, ինչ կապ չունի «Ես» ամսագրի  հետ: