Ի տարբերություն 2016-ի, Պուտինը այս անգամ չի կարող զանգել Փաշինյանին ու ասել՝ զորքերդ հետ քաշի (Տեսանյութ)
Սահմանին այս պահին իրավիճակը կրկին լարված է։ Ադրբեջանը, նորից խախտելով մարտական գործողությունների և կրակի դադարեցման պայմանավորվածությունը, կիրառում է հարվածային անօդաչու թռչող սարքեր, այդ թվում՝ նաև բնակավայրերի ուղղությամբ։ Հակառակորդի մարտական անօդաչուի հարվածից վիրավորվել է Չինարի գյուղի բնակիչ Արամայիս Հովակիմյանը։
Թեմայի շուրջ «Առաջին լրատվական»-ի հետ զրույցում Գլոբալիզացիայի և տարածաշրջանային համագործակցության վերլուծական կենտրոնի ղեկավար, քաղաքագետ Ստեփան Գրիգորյանը, անդրադառնալով հարցին, թե սահմանային լարվածությունն արդյո՞ք կարող է վերաճել լայնածավալ պատերազմական գործողության, նշեց. «Լարվածությունը ուժեղանում է, մարտեր են ընթանում, և դա ճակատագրական դեր է խաղալու մեր ժողովրդի համար՝ դրական իմաստով: Ջախջախիչ պարտություն կկրի Ադրբեջանը. իրենք սխալներ արեցին, մեր բանակը պատժեց: Նրանք տեսնում են, որ Հայաստանում նոր իշխանություն ունենք՝ թարմ, դինամիկ մտքերով, և հաջողությունները մեզ հետ են»:
Կառավարությունը հուլիսի 10-ին ընդունեց ազգային անվտանգության նոր ռազմավարություն: Կարևոր է այն, որ որդեգրվել է մի սկզբունք, որը նախկին իշխանությունները չէին որդեգրել, բայց շատ պետություններ կիրառում են, դա այն է, որ չես սպասում սպառնալիքը հասունանա և հուժկու հարված հասցնի քեզ, հետո նոր արձագանքեց. նախ՝ պետք է հետևես քո թշնամուն և կանխարգելիչ գործողություններ իրականացնես, և երկրորդ՝ պատժիչ գործողություններ իրականացնես, այսինքն՝ երբ սխալ ես թույլ տալիս, հակահարված ենք հասցնում, բայց կանգ չենք առնում: Եթե դա արվեր 2016թ. Ապրիլյան պատերազմի ժամանակ, Ադրբեջանը առնվազն 20 տարի սուս-փուս նստած կմնար, կսահմանափակվեր միայն ագրեսիվ ելույթներ ունենալով:
Ալիևը նեղանում է Ռուսաստանից, որ 2016թ.-ի նման չի կարողանում հրաման տալ, որ հայերն առաջ չգնան: Հայաստանում իշխանությունը հիմա ենթարկվում է միայն հայ ժողովրդին… Ի տարբերություն 2016-ի, Պուտինը այս անգամ չի կարող զանգել Փաշինյանին ու ասել՝ զորքերդ հետ քաշի: