ԱՄՆ-ը մտադիր է նոր պատժամիջոցներ կիրառել «Հյուսիսային հոսք 2»-ի եւ «Թուրքական հոսք»-ի հանդեպ
ԱՄՆ-ը մտադիր է նոր պատժամիջոցներ կիրառել «Հյուսիսային հոսք 2»-ի եւ «Թուրքական հոսք»-ի հանդեպ, ասել է ԱՄՆ պետքարտուղարը: Նա ռուսաստանյան նախագծերում ներդրողներին խորհուրդ է տվել «հիմա հեռանալ» կամ կբախվեն հետեւանքների, գրում է Forbes-ը:
ԱՄՆ պետքարտուղար Մայք Պոմպեոն հայտարարել է «Հյուսիսային հոսք 2» գազատարը հատուկ կարգավիճակից զրկելու մասին՝ 2017թ․ ԱՄՆ պատժամիջոցների մասին օրենքի առումով, հայտնում է The Wall Street Journal-ը: Նա ընդգծել է, որ այժմ նախագահ Դոնալդ Թրամփի վարչակազմը նոր սահմանափակումներ է մտցնում նախագծի հանդեպ, հայտնում է Bloomberg-ը:
Պոմպեոյի խոսքերով՝ Պետդեպարտամենտը կչեղարկի վերապահումը, ըստ որի «Հյուսիսային հոսք 2»-ը հանվել էր սահմանափակումների նախագծից: Խոսքը վերաբերում է «Ամերիկայի հակառակորդներին պատժամիջոցների միջոցով հակահարված տալու մասին» օրենքին (CAATSA), բացատրում է թերթը: Նախկին պետքարտուղար Ռեքս Թիլերսոնը հանձնարարել էր հանել Ռուսաստանի արտահանման խողովակաշարերի շինարարական ծրագրերը այն ցուցակից, որում ներառվածներն ընկնում են ամենախիստ պատժամիջոցների տակ: WSJ-ն ընդգծում է, որ «Թիլերսոնի փոփոխության» շնորհիվ «Հյուսիսային հոսք 2»-ը կարողացավ ներդրումներ ներգրավել եւ վարկային պայմանագրեր կնքել:
Սակայն Պոմպեոյի հայտարարությունից հետո խողովակաշարը հնարավոր է ընկնի CAATSA-ի 232-րդ բաժնի տակ, որը Միացյալ Նահանգներին հնարավորություն է տալիս պատժամիջոցներ կիրառել այն անձանց նկատմամբ, ովքեր նախագծում (մեկ տարվա ընթացքում) ներդրել են 1 միլիոն դոլար կամ 5 միլիոն դոլար, եւ նաեւ Ռուսաստանին տրամադրել են «ուղղակի եւ նշանակալի» աջակցություն՝ շինարարության համար: Հնարավոր պատժամիջոցները ներառում են գույքի առգրավում, տեղաշարժի սահմանափակում կամ բանկային եւ ֆինանսական ծառայություններ ստանալու սահմանափակում:
ԱՄՆ-ն անցյալ տարվա դեկտեմբերին արդեն պատժամիջոցներ կիրառել էր «Հյուսիսային հոսք 2»-ի հանդեպ՝ պատճառաբանելով դրանք այն փաստով, որ նախագիծը սպառնում է Եվրոպայի էներգետիկ անվտանգությանը: Ռուսաստանը հերքել է այդ մեղադրանքները: Սահմանափակումներ կիրառելուց հետո «Գազպրոմի» եվրոպական կապալառուները, որոնք կառուցում էին գազատարը, դադարեցրել են աշխատանքը եւ հետ կանչել իրենց նավերը: Ռուսաստանի իշխանությունները հայտարարել են, որ երկիրը կկարողանա ինքնուրույն ավարտել խողովակաշարի կառուցումը, բայց ժամկետից մի փոքր ուշ: Միացյալ Նահանգներն էլ հայտարարել են, որ Ռուսաստանը չի կարողանա ավարտել գազատարի կառուցումը:
Հունիսի սկզբին հայտնի դարձավ, որ ամերիկացի սենատորները որոշել են ընդլայնել «Հյուսիսային հոսք 2»-ի դեմ պատժամիջոցները։ ԱՄՆ կոնգրեսականները միաժամանակ առաջարկել են պատժամիջոցների ավելի մեղմ այլընտրանքային նախագիծ: