Էլեկտրականությունը ոչ մի գյուղում չի խաթարվել. ունեցել ենք գազատարի 2 վնաս, երկուսն էլ արդեն վերականգնված է. Չոբանյան

Այս օրերին գյուղատնտեսական աշխատանքները գրեթե չեն դադարել: Այս մասին այսօր՝ հուլիսի 15-ին, լրագրողների հետ զրույցում նշեց Տավուշի մարզպետ Հայկ Չոբանյանը:

«Բնականաբար, մարդիկ անհանգստությունից ելնելով, որոշակի վերապահումներով են մասնակցել գյուղատնտեսական աշխատանքներին, բայց ստուգելով նաեւ ջրառի ծավալները, տեսել ենք, որ մարդիկ զբաղված են եղել գյուղաշխատանքներով:

Ի դեպ, այս տարի շատ լավ բերք ունի Տավուշը, հույս ունեմ, որ բնակիչները գոհ կլինեն արդյունքներից:

Անցած տարվանից սահմանամերձ գյուղերի դիմակայունության բարձրացման հատուկ ծրագիր ենք իրականացնում: Փորձնական ծրագիրը լիարժեք իրականացվել է Տավուշի մարզի միայն մեկ գյուղում՝ Բերդավանում: Այժմ իրականացվում է մյուս գյուղերում: Ես հույս ունեմ, որ առաջիկա 1-2 տարվա ընթացքում գյուղերի դիմակայունությունը ավելի կբարձրացնենք: Դա ներառում է եւ ապաստարաններով հագեցվածություն, գյուղերի տեխնիկական ապահովվածությունը, սահման տանող ճանապարհների տեսահսկում, անլար հատուկ կապի միջոցների տրամադրում եւ այլն: Մենք այս օրերին շտապօգնության մեքենաները բաշխել ենք բոլոր սահմանամերձ գյուղերով: Հենց այս պահին Տավուշի մարզ են մտնում եւս 5 ամենագնաց շտապօգնության մեքենաներ»,-ասաց մարզպետը:

Նա նկատեց, որ միայն սահմանամերձ գյուղերի անվտանգությունն ապահովելը շատ քիչ է, պետք է տնտեսական զարգացման հիմքեր ստեղծվեն. «Դրա համար, նրանք, որոնք մտահոգված են Տավուշով, կոչ եմ անում խաղաղության ժամանակ եւս համակ ուշադրությամբ լցված լինեն: Մենք ուզում ենք մարդկանց մասնակցությունը տնտեսական կյանքին ներդրումային ծրագրերով»:

Դիտարկմանը, որ որոշ գյուղերում էլեկտրակնություն եւ գազ չկա, Հայկ Չոբանյանն ասաց. «Էլեկտրականությունը ոչ մի գյուղում չի խաթարվել: Ունեցել ենք գազատարի երկու վնաս, երկուսն էլ արդեն վերականգնված է»: