Թրամփի զարմուհին նոր գրքում կասկած է հայտնել ԱՄՆ նախագահի հոգեկան առողջության վերաբերյալ
ԱՄՆ նախագահ Դոնալդ Թրամփը ընտանիքի բացասական ազդեցության պատճառով զուրկ է այլ մարդկանց կարեկցելու ունակությունից եւ տառապում է բազմաթիվ բարդույթներից: Նման պնդմամ է հանդես եկել ԱՄՆ առաջնորդի զարմուհի Մերի Թրամփը՝ իր «Չափազանց շատ եւ երբեք ոչ բավարար. Ինչպե՞ս է իմ ընտանիքը ստեղծել աշխարհի ամենավտանգավոր մարդուն» (Too Much And Never Enough: How My Family Created the World's Most Dangerous Man) գրքում, որը հայտնվել է վաճառքում, փոխանցում է ՏԱՍՍ-ը:
ԱՄՆ առաջնորդի զարմուհին, ով կլինիկական հոգեբանության դոկտորի աստիճան ունի, նշում է, որ մանկության տարիներին Դոնալդ Թրամփի աշխարհայացքը ձեւավորող գործոններից մեկը ձգտումն էր ամեն գնով արժանանալ իր հոր՝ Ֆրեդերիկ Թրամփի հավանությանը։ Ըստ հեղինակի՝ պայմանները, որոնցում մեծացել եւ դաստիարակվել է ԱՄՆ առաջնորդը, զրկել են նրան կարեկցելու ունակությունից, ինչպես նաեւ կտրել են նրա կապն իրական աշխարհի հետ։
ԱՄՆ առաջնորդի զարմուհին, վկայակոչելով կլինիկական հոգեբանի իր անձնական փորձը, պնդում է, որ իր հորեղբոր մոտ առկա են «նարկիսիզմի բոլոր ինը կլինիկական նշանները»: «Բանն այն է, որ Դոնալդի պաթոլոգիաներն այնքան համալիր բնույթ են կորւմ, իսկ նրա վարքագիծը երբեմն այնքան անբացատրելի է, որ ճշգրիտ եւ հավասարակշռված ախտորոշման համար անհրաժեշտ է հոգեբանական եւ նյարդաֆիզիոլոգիական թեստերի մի ամբողջ շարք անցկացնել, ինչին նա երբեք չի համաձայնի»,- գրում է Մերի Թրամփը:
«Նրա համար միշտ ամեն ինչ քիչ է, եւ դուրս է գալիս սովորական ինքնասիրահարվածության շրջանակներից,- գրում է նա:- Դոնալդը պարզապես թույլ բնավորություն չէ: Նրա ինքնասիրությունը շատ փխրուն է եւ անընդհատ պետք է ինչ-որ բանով ամրապնդվի, քանի որ խորը ներսում նա գիտակցում է, որ ինքը այն չէ, ինչ ուզում է թվալ»:
ԱՄՆ նախագահի զարմուհին իր գրքում նշում է, որ Սպիտակ տան ղեկավարի ինքնասիրահարվածությունը թույլ չի տալիս նրան սթափ նայել իրերին եւ որոշում կայացնել՝ հիմնվելով ստեղծված իրավիճակի վրա կամ առաջնորդվելով հստակ ռազմավարությամբ: «Դոնալդի էգոն միշտ եղել է եւ մինչ օրս փխրուն եւ անօգուտ պատնեշ է իր եւ իրական աշխարհի միջեւ»,- գրում է Թրամփի զարմուհին:
Միացյալ Նահանգների նախագահն այդպիսի հոգեբանական դիմանկարի ձեւավորման հիմնական պատճառներից մեկը Մերի Թրամփը համարում է նրա հարաբերությունները հոր հետ, որին ինքը սոցիոպաթ է անվանում: «Սահմանափակելով Դոնալդի մուտքն իր սեփական զգացմունքներին եւ դրանց շատ հաճախ անընդունելի անվանելով՝ Ֆրեդերիկ Թրամփ ավագն այլասերել է իր որդու աշխարհընկալումը եւ խախտել է աշխարհում գոյատեւելու նրա կարողությունը»,- գրում է հեղինակը:
Ընդ որում, նա նշում է, որ «հոր փողերը եւ ազդեցությունը» նպաստել են նրան, որ Դոնալդ Թրամփը կասկածի տակ չի դնում սեփական անձի կարեւորությունը: «Դոնալդն իր հասուն կյանքի մեծ մասն անցկացրել է հստակ սահմանված շրջանակներում»,- շարունակում է նախագահի զարմուհին՝ ընդգծելով, որ Թրամփի համար այդպիսի փակ պայմաններ են ստեղծվել նաեւ Սպիտակ տանը: «Ուստի անհնար է հասկանալ, թե որքանով նա կարող էր բարգավաճել կամ գոնե գոյատեւել՝ դեմ առ դեմ հայտնվելով իրական աշխարհի հետ»,- շեշտում է հեղինակը:
Գրքի հեղինակը պատմում է, որ իր հայրը՝ նախագահի ավագ եղբայր Ֆրեդ Թրամփ կրտսերը (1938-1981), հաճախ հոր կողմից եղբոր հետ համեմատության մեջ էր դրվում, ով, հիասթափվելով ավագ որդուց, ներդնում էր իր աբմողջ ուժերն ու միջոցները Դոնալդի զարգացման մեջ՝ միունույն ժամանակ նպատակ ունենալով իրականացնել իր սեփական ամբիցիաները:
Իսկ ԱՄՆ գործող նախագահը հետագայում ամրապնդվեց իր առավելության գիտակցման մեջ: «Հայրս ճիշտ է քո հարցում: Դու ոչ ավել ես, քան ավտոբուսի հայտնի դարձած վարորդը»,- այսպես էր, Մերի Թրամփի խոսքով, ԱՄՆ առաջնորդը դիմում եղբորն այն բանից հետո, երբ վերջինս դարձավ օդաչու Trans World Airlines ընկերությունում։
Մերի Թրամփն ուշադրություն է դարձնում այն բանի վրա, որ հոր բացասական ազդեցությունը բթացրել է Դոնալդ Թրամփի՝ այլ մարդկանց կարեկցելու ունակությունը, այդ թվում՝ հարազատներին։ Որպես օրինակ՝ նա մեջբերում է ԱՄՆ ներկայիս առաջնորդի պահվածքը 1981 թվականի սեպտեմբերի 26-ի լույս 22-ի գիշերը, երբ Մերիի հայրը՝ Ֆրեդ Թրամփ կրտսերը, մահացու վիճակում գտնվում էր հիվանդանոցում: Նրա խոսքով՝ եղբորը սատարելու փոխարեն Դոնալդը «գնաց կինոթատրոն՝ թողնելով նրան մահանալ միայնության մեջ»:
«Եթե նա կարող է որեւէ օգուտ քաղել ուրիշի մահից, նա, անշուշտ, կդյուրացնի այս գործընթացը, իսկ ավելի ուշ կանտեսի մահվան փաստը»,- կարծում ԱՄՆ առաջնորդի զարմուհին: «Մինչ հազարավոր ամերիկացիներ մահանում են միայնության մեջ, Դոնալդը պարծենում է ֆոնդային ինդեքսների աճով»,- նշում է հեղինակը: Ֆրեդ Թրամփ կրտսերը տառապում էր ալկոհոլիզմից եւ մահացավ սրտի կաթվածից 1981 թվականին՝ 42 տարեկանում:
Մերի Թրամփն իր գրքում մեջբերում է Միացյալ Նահանգների նախագահի ավագ քրոջ՝ Մերիեն Թրամփ Բերի կարծիքը: Նա նախկինում դաշնային դատավոր էր: Թրամփ Բերին կասկած էր հայտնել, որ իր եղբայրը հարմար է Միացյալ Նահանգների նախագահի պաշտոնի համար: 2015 թվականին նա նշել էր, որ Թրամփը, որն այն ժամանակ հայտարարել էր ընտրություններին մասնակցելու իր մտադրության մասին, չի կարողանա հաղթել: «Նա ծաղրածու է»,- գրքում մեջբերվում են Մերիենի խոսքերը:
Մերիեն Թրամփ Բերին, ինչպես նշվում է գրքում, զարմացած էր, որ իր եղբորն աջակցում են կրոնական ամերիկացիները: «Միակ անգամը, երբ նա եկեղեցի է գնացել, այն ժամանակ էր, երբ ներսում տեսախցիկներ կային։ Բայց դա՝ միայն հանուն իր ընտրողների,- ասել է ԱՄՆ նախագահի քույրը:- Նա սկզբունքներ չունի, բացարձակապես ոչ մի սկզբունք»: Թրամփ Բերին, ինչպես նշվում է գրքում, նաեւ շեշտել է, որ ԱՄՆ առաջնորդն ինքնուրույն ոչնչի չի հասել եւ հաջողակ չէր բիզնեսում: «Նա հինգ անգամ սնանկացել է»,- նշել է նա: