FDA-ն առավելության կարգավիճակ է տվել Pfizer-ի եւ BioNTech-ի փորձնական պատվաստանյութերին
ԱՄՆ Սննդամթերքի եւ դեղամիջոցների որակի վերահսկման վարչությունը (FDA) առավելության կարգավիճակ է տվել կորոնավիրուսի դեմ երկու փորձնական պատվաստանյութերի, որոնք համատեղ մշակվել են գերմանական կենսատեխնոլոգիական BioNTech ընկերության եւ ամերիկյան դեղագործական հսկա Pfizer ընկերության կողմից, հայտնում է «Ամերիկայի ձայն»-ը:
BNT162b1-ը եւ BNT162b2-ը ամենաառաջադեմ փուլում են առնվազն չորս պատվաստանյութերի շարքում, որոնք ներկայումս կլինիկական փորձարկումներ են անցնում ԱՄՆ-ում եւ Գերմանիայում:
Սակարկումների մեկնարկի նախաշեմին Pfizer-ի բաժնետոմսերը աճել են 2 տոկոսով, իսկ ԱՄՆ-ում գրանցված BioNTech բաժնետոմսերը՝ 6 տոկոսով:
Այս ամիս, ավելի վաղ, ընկերությունները հայտարարել են, որ BNT162b1 պատվաստանյութը հավանական արդյունավետություն է ցուցաբերել վիրուսի դեմ եւ մարդկանց վրա առաջին փորձարկումների ժամանակ լավ է յուրացվել նրանց կողմից:
Գերմանիայում BNT162b1 հետազոտության նախնական արդյունքները սպասվում են հուլիսին, հայտարարում են ընկերությունները: Եթե փորձերը հաջողվեն եւ պատվաստանյութերը կարգավորողների հավանությանն արժանանան, ընկերությունները նախատեսում են մինչեւ տարեվերջ արտադրել 100 միլիոն չափաբաժին, իսկ մինչեւ 2021 թվականի ավարտը՝ ավելի քան 1,2 միլիարդ չափաբաժին:
Եթե թույլտվություն ստանան, ընկերությունները պլանավորում են այս ամիս սկսել 30 000 մարդու մասնակցությամբ լայնածավալ փորձարկումներ: FDA-ն առաջնահերթությունը տալիս է առավել խոստումնալից պատվաստանյութերին եւ դեղամիջոցներին: