Կորոնավիրուսի դեմ պատվաստանյութի ռուս մշակողը նշել է դրա պատրաստ լինելու ժամկետը

COVID-19-ի դեմ պատվաստանյութը կլինիկական փորձարկումներ կանցնի եւ բժշկական հաստատություններում օգտագործման համար համապատասխան թույլտվություն կստանա մինչեւ օգոստոսի կեսը: Այս մասին հայտարարել է Գամալեյի անվան համաճարակաբանության եւ մանրէաբանության ազգային հետազոտական կենտրոնի տնօրեն Ալեքսանդր Գինցբուրգը, հայտնում է ՌԻԱ Նովոստին:

Կենտրոնում ակնկալում են, որ պատվաստանյութի գրանցման գործընթացը կտեւի մինչեւ օգոստոսի 2-4-ը, որից հետո որոշ ժամանակ կպահանջվի «Ռոսզդրավնադզոր»-ում քաղաքացիական շրջանառության համար առանձին թույլտվություն ստանալու գործընթացի համար: «Դե, մոտ օգոստոսի 14-15-ը, հուսով եմ, որ պատվաստանյութի փոքր քանակությունը, որը կարող է մշակվել, քաղաքացիական շրջանառության մեջ կդրվի»,- ասել է նա:

Գինցբուրգի խոսքերով՝ մինչեւ օգոստոսի կեսը փորձարկումների երկրորդ փուլն ամբողջությամբ կավարտվի, եւ կթույլատրվի քաղաքացիական շրջանառությունը, որը իրականում երրորդ փուլն են: Ինստիտուտի տնօրենը պարզաբանել է, որ պատվաստանյութը քաղաքացիական շրջանառության մեջ օգտագործելու գործընթացում կստուգվեն դեղամիջոցը ստացած հիվանդները: Նա նշել է, որ եթե մարդկանց մոտ առաջանան կողմնակի ազդեցություններ, ապա առողջապահության նախարարությունն իրավունք ունի հետ կանչել թույլտվությունը:

Գիտնականը ենթադրել է, որ մասնավոր ընկերությունները կսկսեն կորոնավիրուսի դեմ պատվաստանյութը արտադրել սեպտեմբերի սկզբին-սեպտեմբերի վերջին: Ըստ նրա, բանակցություններ են ընթանում մասնավոր ձեռնարկությունների հետ՝ հնարավորինս արագ փոխանցելու տեխնոլոգիան եւ արտադրության համար անհրաժեշտ բոլոր բաղադրիչները:

Միաժամանակ, ինչպես նշել է ինստիտուտի տնօրենը, աշխատանքներ են տարվում բժշկական հաստատություններ դեղամիջոցն առաքելու համար մատակարարման ցանցեր ստեղծելու ուղղությամբ:

Գամալեյի համաճարակաբանության եւ մանրէաբանության ազգային հետազոտական կենտրոնի կողմից մշակված պատվաստանյութի փորձարկումները սկսվել են հունիսի 17-ին՝ Սեչենովի համալսարանում եւ Մոսկվայի Բուրդենկոյի ռազմական հիվանդանոցում: Նրանցից յուրաքանչյուրին մասնակցել են 38 կամավորներ: Ինչպես ավելի վաղ հաղորդել էր առողջապահության նախարարությունը, համալսարանը պատվաստանյութը փորձարկել է փոշու տեսքով, որից տեղում միջմկանային ներարկման համար լուծույթ է պատրաստվում, իսկ զինվորական հիվանդանոցում օգտագործվել է հեղուկ պատվաստանյութ` միջմկանային ներարկումների համար:

Հունիսին Ալեքսանդր Գինցբուրգը հայտարարել է, որ բնակչության զանգվածային պատվաստումներին անցնելու համար անհրաժեշտ է թողարկել 50-70 միլիոն չափաբաժին: Այն ժամանակ նա ենթադրել էր, որ առաջիկա աշնանը ռուսաստանցիները կարող են պատվաստվել: