ԵՄ-ն պատրաստում է հակազդեցություններ Չինաստանի հանդեպ՝ ի պատասխան Հոնկոնգում անվտանգության մասին նոր օրենքի

Եվրամիությունը պատրաստվում է հակազդել Չինաստանին՝ ի պատասխան Հոնկոնգում անվտանգության մասին նոր օրենքի, ասել է ԵՄ գլխավոր դիվանագետը, հայտնում է AP-ն:

Դիվանագետները հայտարարել են, որ ԵՄ անդամ-երկրները աջակցում են որոշ գործողությունների, բայց կոշտ միջոցներ չեն քննարկվում Եվրոպայում Չինաստանի ամենամոտ առեւտրային գործընկերների՝ Հունգարիայի եւ Հունաստանի դիմակայության պատճառով:

Ինչպես Արեւմուտքի մեծ մասը, ԵՄ-ն դատապարտել է Հոնկոնգի ազգային անվտանգության մասին օրենք ընդունելու Չինաստանի խորհրդարանի որոշումը:

Մինչ Եվրահանձնաժողովի նախագահ Ուրսուլա ֆոն դեր Լեյենը հունիսին նախազգուշացնում էր Պեկինի համար «շատ բացասական հետեւանքների» մասին, ԵՄ արտաքին գործերի նախարար Ջոզեպ Բորելը Բրյուսելում ԵՄ արտաքին գործերի նախարարների հանդիպումից հետո ներկայացրել է ավելի հեշտ միջոցառումներ:

«Այսօր մենք պայմանավորվել ենք մշակել Եվրամիության համակարգված պատասխանը, որպեսզի մեր աջակցությունը ցույց տանք Հոնկոնգի ինքնավարությանը եւ քաղաքացիական հասարակությանը»,- հանդիպումից հետո կայացած մամուլի ասուլիսում ասել է Բորելը:

Բորելի խոսքերով՝ ԵՄ կառավարությունները կարող են նաեւ վերանայել Հոնկոնգի իշխանությունների հետ իրենց արտահանձնման պայմանագրերը, ճանապարհորդական առաջարկությունները, ավելացնել հոնկոնգցի ուսանողների կրթաթոշակները եւ ավելի շատ վիզաներ առաջարկել Հոնկոնգի բնակիչներին: