Վիճակը մեր բանակի կողմից վերահսկվում է հարյուր տոկոսով. Բագրատ Սրբազան

Առավոտից Մովսեսում էինք, հետո զորքին ենք այցելել, հիմա էլ Չինարիում ենք։ Այս մասին այսօր՝ հուլիսի 13-ին, NEWS.am-ի հետ զրույցում ասել է Հայ առաքելական եկեղեցու Տավուշի թեմի առաջնորդ գերաշնորհ Բագրատ եպիսկոպոս Գալստանյանը, որը շրջում է իր թեմի բնակավայրերով, հաճախ այցելում մարտական դիրքեր, երբ դա հնարավոր է, զորակցում եւ գոտեպնդում զինծառայողներին ու սահմանամերձ բնակավայրերի բնակիչներին։

«Առավոտից գտնվել ենք Մովսեսում, զորքին ենք այցելել, հիմա էլ Չինարիում ենք։ Լարվածություն, ընդհանուր առմամբ, գոյություն ունի, այդուհանդերձ գյուղում կյանքը խաղաղ է, ժողովուրդը հանգիստ է, որովհետեւ մեծ վստահություն ունի մեր բանակի նկատմամբ։ Մեր զինվորներն ու սպաներն էլ երեկվանից շատ կարեւոր խնդիրներ են լուծում առաջնագծում»,- ասաց Բագրատ սրբազանը։

Նա նշել է, որ ինչպես Մովսեսում, այնպես էլ Չինարիում խոշոր տրամաչափի զինատեսակներից կրակոցների ձայներ լսվում են. «Ըստ լուրերի՝ տանկեր կան ինչ-որ հատվածում, որոնք կրակ են արձակել ոչ գյուղերի, բայց մերձակայքի ուղղությամբ։ Վիճակը մեր բանակի կողմից վերահսկվում է հարյուր տոկոսով։ Այս պահին մտահոգվելու, տագնապելու շատ պատճառ չկա։ Մենք աղոթում ենք եւ խնդրում ենք, որպեսզի իրավիճակը հանդարտվի, խաղաղվի, չունենանք զոհեր ու վիրավորներ։ Մենք տագնապ չունենք, դուք էլ ձեր աչքով տեսնում եք գյուղացիների կյանքը, հանգիստ են վերաբերվում։ Նրանք, դժբախտաբար, սովոր են այս իրավիճակին եւ երկրորդն էլ չափազանց մեծ է վստահությունը՝ մեր բանակի նկատմամբ»։

Հիշեցնենք, որ երեկ՝ հուլիսի 12-ին՝ ժամը 12:30-ի սահմաններում, Ադրբեջանի զինված ուժերի զինծառայողները ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: Հայկական կողմի նախազգուշացումից հետո ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք: Ժամը 13:45-ին ադրբեջանի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից եւ կորուստներ կրելով, հետ շպրտվել: