8 Հուլիս, 2020 11:56

Բոլորը ստիպված կլինեն վճարել ՍԴ-ի հետ կապված «Իմ քայլի» սխալի համար․ «Լուսավոր Հայաստան»-ը՝ ՄԻԵԴ ուղարկված Սահմանադրական դատարանի չորս դատավորների դիմումի վերաբերյալ

8 Հուլիս, 2020 11:56 Իրավունք

ՍԴ դատավորներին աշխատանքից ազատելու որոշումն ի սկզբանե քաղաքական էր: Այս մասին NEWS.am-ի թղթակցի հետ զրույցում ասաց «Լուսավոր Հայաստան» կուսակցության պատգամավոր Տարոն Սիմոնյանը՝ մեկնաբանելով Սահմանադրական դատարանի չորս դատավորների դիմումը Մարդու իրավունքների եվրոպական դատարան:

Պատգամավորը նշել է, որ քաղաքական մեծամասնության կողմից ընդունված որոշումը՝ ի դեմս «Իմ քայլը» իշխող դաշինքի, հակասում էր Սահմանադրությանը: Ընդ որում, նա շեշտեց, որ այս գործընթացը լիովին իրավական հիմքեր ունի, ուստի որոշումը պետք է վիճարկվի իրավական դաշտի շրջանակներում, այլ ոչ թե քաղաքական: «Շատ հայտնի փաստաբաններ եւ իրավապաշտպաններ պաշտպանում են Սահմանադրական դատարանի նախկին դատավորների դիրքորոշումը, եւ դա որոշ չափով կարող է ազդել ՄԻԵԴ-ում այս վեճի լուծման վրա»,- ասաց խորհրդարանականը:

Սիմոնյանը կարծում է, որ, ամենայն հավանականությամբ, իշխանությունները կպարտվեն այս վեճը, եւ ՄԻԵԴ-ը կաջակցի դատավորներին: «Եվ այդ ժամանակ կհետեւեն ֆինանսական տույժերը, եւ դրա համար ստիպված կլինենք վճարել պետբյուջեից, այսինքն՝ հարկատուների՝ մեր եւ ձեր միջոցների հաշվին: Իշխանությունների կողմից նման անշրջահայաց որոշումն աններելի է: Նրանք պետք է հասկանային, թե ինչի այս ամենը կարող է վերաճել, առավել եւս, որ մենք բազմիցս ասել ենք այդ մասին եւ բազմիցս զգուշացրել ենք նրանց։ Երկիրն այժմ այն վիճակում չէ այդքան անմտորեն իր ֆինանսները կորցնելու համար։ Այդ միջոցներն ավելի մեծ օգուտով կարելի էր օգտագործել երկրի եւ հասարակության համար: Ստացվում է, որ մեկ քաղաքական ուժի որոշման պատճառով, որը դեմ է երկրի հիմնական օրենքին, կտուժենք մենք բոլորս»,- եզրափակեց Տարոն Սիմոնյանը:

Այս թեմայով