Կառավարությունը պատրաստվո՞ւմ է փոխհատուցել կրոնավիրուսից տանը բուժվող մարդկանց բուժման ծախսերը
Տնային պայմաններում թոքաբորբի բուժման ժամանակ ներառված են այնպիսի դեղորայք, որոնք մատչելի են եւ կարիք չկա դրանից դուրս այլ դեղեր գնել: Այս մասին, այսօր՝ հուլիսի 7-ին, լրագրողների հետ հանդիպման ժամանակ նշեց ՀՀ առողջապահության նխարար Արսեն Թորոսյանը՝ անդրադառնալով հարցին, թե արդյոք կառավարությունը պատրաստվում է փոխհատուցել մարդկանց բուժման ծախսերը, եթե նրանք տանն են բուժվում կորոնավիրուսից:
«Եթե իսկապես այլ դեղերի կարիք կա, ապա այդ քաղաքացին չպետք է բուժվի տանը, պետք տեղափոխվի հիվանդանոց: Բուժման պրոտոկոլի մեջ ներառված դեղերի մի մասը, հատկապես այնպիսի դեղեր, որոնք հարաբերականորեն ավելի թանկ են, թեեւ դրանք մի քանի հազարի շրջանակում են, իրականացրել ենք կենտրոնացված գնում եւ բաշխել ենք, ՀՀ բոլոր պոլիկլինիկական համակարգերին:
Նաև ուզում եմ հիշեցնել, որ շատ քաղաքացիներ, որոնց մոտ դրական ախտորոշում կա, ընդհանրապես բուժման կարիք չունեն, պարզապես պետք է տանը մնան»,-ասաց նա:
Թորոսյանը շեշտեց, որ Կորոնավիրուսի հանդեպ հակամարմինների առկայությունը վարքագիծ փոխելու, դիմակ չկրելու կամ սոցիալական հեռավորությունը չպահելու հիմք չի կարող լինել:
«Եթե որեւէ քաղաքացու մոտ կան հակամարմիններ, նա չպետք է իրեն իրավունք վերապահի՝ թե մտովի, թե իրավական առումով, օրինակ, չկրել դիմակ, չպահպանել սոցիալական հեռավորությունը, քանի դեռ չկա ապացույց, որ նա կրկին չի վարակվի։ Չկա ապացույց իր մոտ եղած հակամարմինների առկայության երկարատեւության։ Այսօր եղած հակամարմինները, ինչպես շատ հիվանդությունների ժամանակ, հատկապես սեզոնային հիվանդությունների ժամանակ, կարող են ընդամենը մի քանի ամիս լինել բավարար մակարդակի վրա, հետո իջնել եւ վերանալ, եւ մարդը կրկին հիվանդանա այդ հիվանդությունով», - ասաց նախարարը։
Նրա խոսքով՝ կորոնավիրուսի հանդեպ հակամարմինների հետազոտությունները կարող են ընդամենը ցույց տալ տվյալ ժամանակահատվածում հիվանդացած եւ լավացած քաղաքացիների մոտավոր տոկոսը։
«Ինչու՞ եմ ասում մոտավոր։ Որովհետեւ նույնիսկ կան հետազոտություններ, որոնք ցույց են տալիս, որ քաղաքացիներ կան, որոնց մոտ բավարար հակամարմինների տիտր նույնիսկ հիվանդանալուց եւ լավանալուց հետո չի առաջանում։ Դրա համար հիմնվել նման հետազոտությունների վրա պետությունը իր քաղաքականությունը մշակելիս չի կարող, եւ անձն էլ չի կարող եւ չպետք է վարքագծային փոփոխություն անի, ունենալով հակամարմինների տիտր», - ասաց Արսեն Թորոսյանը։
Նրա խոսքով, Հայաստանի Ամերիկյան համալսարանը այժմ իրականացնում է կորոնավիրուսի հանդեպ հակամարմինների առկայության հետազոտություն բուժաշխատողների շրջանում, որից հետո հնարավոր է, որ նման հետազոտություն անցկացվի նաեւ ազգաբնակչության շրջանում, սակայնց այդ հետազոտությունների տվյալները մեծ նշանակություն չեն ունենալու քաղաքականության մշակման համար։