Դիմակների պատշաճ կրելը ապացուցել է, որ դրանք արդյունավետ են. Եթե այդպես չլիներ, մենք հազարապատիկներով ավելի շատ դեպքեր կունենայինք (Տեսանյութ)

Կատարված թեստերի 30 տոկոսի դեպքում պատասխանը դրական է. լավ է, որ այդ առումով աճ չկա, բայց վատ է, որ բացարձակ առումով այդ թվերը մնում են բարձր: Այս մասին, այսօր՝ հուլիսի 6-ին, պարետատան նիստից հետո կայացած ճեպազրույցի ժամանակ նշեց առողջապահության նախարար Արսեն Թորոսյանը:

«Երեկվա դրությամբ մեր մահճակալային ընդհանուր ֆոնդը արդեն հասել է 2600-ի, որից 2300-ը սովորական մահճակալներ են, դրանց մեծ մասը հագեցած է թթվածնային կենտրոնական մատակարարումով, իսկ մոտ 300-ը վերակենդանացման մահճակալներն են: Զբաղվածությունը շատ բարձր է, հատկապես վերակենդանացման բաժանմունքներում:

Ծանր և ծայրահեղ ծանր պացիենտների ընդհանուր թիվը մոտ 650 է, նրանցից 47-ը գտնվում է թոքերի արհեստական շնչառության սաքրերի տակ: Հարաբերականորեն բարվոք է տանը սպասող մեր քաղաքացիների, այսինքն ժամը 3-ի դրությամբ մենք չունենք որևէ պացիենտ, որը ունի հրատապ հոսպիտալիզացիայի կարիք, բայց հոսպիտալացված չէ: Նաև ունենք 20 պացիենտ, որոնք կարիք ունեն այլ հիվանդանոցներից տեղափոխվելու կորոնավիրուսային հիվանդությամբ զբաղվող ԲԿ-ներ»,-ասաց նախարարը:

Նա հավելեց, թե այն, որ ամեն օր ունենում ենք հարաբերականորեն կայուն թվեր, դա ևս հակահամաճարակային միջոցառումների շնորհիվ է. «Սովորաբար նման համավարակները տարածվում են պայթյունաձև, բայց մենք նման իրավիճակ չունենք: Այսինքն դիմակների պատշաճ կրելը մեզ մոտ էլ է ապացուցել, որ դրանք արդյունավետ են: Եթե այդպես չլիներ, մենք հազարապատիկներով ավելի շատ դեպքեր կունենայինք: Այսինքն դիմակների կրումը աշխատում է:

Ինչպես առանց կոշիկ հագնելու տնից դուրս չենք գալիս, այնպես էլ պետք է առանց դիմակի դուրս չգանք, չպետք է դիկմակը իջեցնենք ու բացենք մեր քիթը: մենք չենք հանում մեր շորերը եւ մերկ ման չենք գալիս փողոցում»,-ասաց նա: