Տեսան, որ մեր տատիկն է, նորից հուղարկավորեցինք. քանի՞ արտաշիրիմում է արվել գյումրեցի տատիկի մարմինը գտնելու համար

Գյումրեցի տատիկի կորած դիակի փնտրտուքներով պայմանավորված՝ համապատասխան մարմինները դիմել են Նոր Հաճնի բնակիչ Հովիկ Ադամյանի ընտանիքին, որպեսզի արտաշիրիմում անեն օրերս կորոնավիրուսից մահացած իրենց տատիկին։ Քանի որ Ադամյանների տատիկի մահվան օրը համընկնել է գյումրեցի տատիկի մահվան օրվա հետ, կասկածներ են եղել, որ նրանք սխալմամբ իրենց հանգուցյալի փոխարեն գյումրեցի տատիկի մարմինն են հողին հանձնել։ Հովիկ Ադամյանը NEWS.am-ին պատմել է,, որ մարմինը արտաշիրիմելուց և դիահերձարան տեղափոխելուց հետո պարզվել է, որ իրենք, այնուամենայնիվ, շփոթած չեն եղել իրենց հարազատին։

«Արտաշիրիմում արեցին, տեսան, որ մեր տատիկն է, նորից բերեցինք, հուղարկավորեցինք։ Դա մեզ համար հաճելի չէր, համենայն դեպս այդ գյումրեցի տատիկի համար այդքան բան արեցինք»,- ասաց նա։

Արդյոք Ադամյանները միա՞կ ընտանիքն են, որ ստիպված է եղել արտաշիրիմում իրականացնել այս թնջուկը լուծելու համար, եւ արդյոք գյումրեցի կնոջ դին հենց արտաշիրիմմա՞ն արդյունքում են գտել, հստակ պարզ չէ։

«Դե կասկածներ կային, որ շփոթմունք է եղել։ Մենակ մերը չի եղել, մի քանի կասկածներ է եղել, տարել են, տեսել են, որ սենց է։ Հետո այնտեղ նայեցին, տեսան, որ այս, այն ազգանունների հետ կապված բաներ կան, հետո իմացան՝ որը որից հետո է․․․ Նայել են տարիքի հետ կապված, մի պահ մտածում էին, որ տղամարդու անուն–ազգանունով են դուրս գրել այնտեղից։ Իսկ էդ տատիկը ուրիշ անուն–ազգանունով մորգում պառկած է եղել, հիմա էս մեկին հանեցին, էն մեկից հանեցին, տեսան՝ չէ, վերջը տեսան, որ էդ տատիկը էնտեղ պառկած է՝ ուրիշ անուն– ազգանունով»,- ասաց Հովիկ Ադամյանը՝ նշելով, որ իր տեղեկությամբ, հիմնական խնդիրը եղել է սխալ գրանցված անուն–ազգանունը։

Ի դեպ, սա ընտանիքում առաջին կորուստը չէ կորոնավիրուսից։ Վերջին 14 օրվա ընթացքում մահացել էր նաեւ կնոջ ամուսինը։ Հովիկ Ադամյանն այս ընթացքում հասցրել է ծանոթանալ դիահերձարաններում տիրող իրավիճակին, գիտի՝ ինչպես են ճանաչման պրոցեսն իրականացնում եւ չի զարմանում, որ կարող էր նման բացթողում լինել։

«Ես մտել, տեսել եմ՝ ոնց են ճանաչում, լրիվ փաթեթավորված։ Գլուխը բացում են, նայում ես՝ աչքերը փակ են, քիթը փակ, ականջները փակ , մենակ ճակատ է ու մազեր, կկարողանա՞ն էդպես ճանաչել, պետք է լուրջ մտածեն, որ միգուցե նախօրոք նկարեն, կամ մի ուրիշ ձեւ, որովհետեւ հասկանալի է՝ կորոնավիրուս է։ Եվ բացի այդ՝ բերեք մտնենք այդ բժիշկների, բժշկուհիների, բուժքույրերի, սանիտարների, հավաքարարների դրության մեջ։ Վերջիվերջո, մարդիկ օրուգիշեր, առավոտից երեկո տանջվում են բոլորիս բարեկամների համար։ Մարդ է՝ հիմա ինչ-որ մի տեղ էլ կարող է վրիպել, չի կարելի քաղաքականացնել և այլն։ Այսօր ի՞նչ իրավունք ունեն քաղաքական ուժերը զբաղվեն այս հարցով կամ․․․․ Մեզ համար շատ տգեղ երևույթ եղավ, մենք շատ վիրավորված ենք, որ քաղաքականացրել են »,- ասաց Ադամյանը՝ նշելով,ո ր իրենց հանգուցյալին ճանաչել է որդին։

Առողջապահության նախարարությունից NEWS.am-ին առայժմ չհաջողվեց ստանալ չպարզաբանված հարցերի պատասխանները՝ մասնավորապես, թե քանի՞ մարդու դիակ է արտաշիրիմվել, արդյոք գյումրեցի կնոջ դին արտաշիրիմման արդյունքո՞ւմ է գտնվել, և արտաշիրիմումը նախարարությո՞ւնն է իրականացնում, թե՞ հարազատները։

Նախարարության հասարակայնության հետ կապերի և տեղեկատվության վարչությունից մեզ հորդորեցին գրավոր հարցում ուղարկել։ Հարցման պատասխանները ստանալուն պես NEWS.am-ը դրանք կներկայացնի ընթերցողին։

Հիշեցնենք, որ օրեր առաջ Մարիամ Մալխասյանը ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանին ահազանգել էր, որ հունիսի 29- ի առավոտյան «Սուրբ Գրիգոր Լուսավորիչ» ԲԿ-ում կորոնավիրուսից մահացել է իր տատիկը, սակայն նրա դին մինչ այդ պահը իրենք չէին կարողացել գտնել։ Նախօրեին՝ հուլիսի 2-ին, դին գտնվել է, արտաշիրիմվել եւ այսօր հուղարկավորվել։ Ընտանիքին հայտնել են, որ հանգուցյալին սխալմամբ նորհաճնեցի մի ընտանիք է հուղարկավորել։

Առողջապահության նախարար Արսեն Թորոսյանն այսօր անդրադարձել է դեպքին՝ նշելով, որ տեղի է ունեցել շփոթմունք։

«Հարազատը ճանաչել է իր հարազատի դին, բայց իրականում այդպես չի եղել: Հետո նրանք ներողություն են խնդրել, որ սխալ մարդու դի են ճանաչել»,- ասել է նա։