Մեր գործողությունները որպես պատգամավոր որեւէ կերպ չեն հակասում ոչ Սահմանադրությանը, ոչ գործող օրենսդրությանը. Մակունց

Մենք ուշադրության կենտրոնում ենք պահում բոլոր կոնտակտավորներին, որովհետեւ ըստ էության, բոլորս կոնտակտավոր ենք, այդ թվում նաեւ դուք՝ լրագրողներդ: Այս մասին այսօր՝ հունիսի 30-ին, ԱԺ-ում լրագրողների հետ զրույցում նշեց ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով հարցին, թե ինչո՞ւ պատգամավորները չեն ինքնամեկուսանում՝ դրանով խախտելով հակահամաճարակային կանոնները, քանի որ իրենք կոնտակտավոր են:

«Մենք պետք է ուշադիր եւ զգոն լինենք: Ինչ վերաբերում է ինքնամեկուսանալուն, ապա ըստ բժիշկների ցուցումի, նրանց հետ խորհրդակցելով ձեռնարկվում են միջոցառումներ: Այն պատգամավորները, որոնք առավել շատ շփումների մեջ են, այդ թվում ես, ձեռնարկում ենք բոլոր քայլերը, որոնք բժիկներն են ասում:

Բոլոր նրանք, որոնք վարակակիր են, մեկուսացած են: Բոլոր նրանք, որոնք կոնտակտավոր են եւ հնարավոր է, որ ունենան ախտանշաններ, նրանք հանձնում են թեստեր եւ եթե դրական կլինի, բնականաբար, չեն գա: Ով ներկայացել է, ուրեմն ախտանշան չունի, կամ եթե ունեցել է, թեստ է հանձնել եւ բացասական է եղել»,-ասաց Մակունցը:

Հարցին, թե արդյոք Հրայր Թովմասյանի լիազորությունները, ով հասցրել է արձակուրդ գնալ, դադարե՞լ են արդեն, Մակունցն ասաց. «Այդ հարցադրումը քաղաքական դաշտից դուրս է, դրան պետք է անդրադառնան իրավաբանները»:

Ինչ վերաբերում է Հրայր Թովմասյանի հայտարարությանը, թե ամաչում է ԱԺ-ում հունիսի 22-ին տեղի ունեցածի համար, «Իմ քայլի» ղեկավարն ասաց. «Ես Հրայր Թովմասյանի հայտարարությունը համարում եմ զգայական, էմոցիոնալ»:

Լիլիթ Մակունցը նշեց, որ իրենց բացարձակապես չի մտահոգում, որ երեք քաղաքական ուժեր՝ ՀՅԴ, ԲՀԿ, «Հայրենիք», հանցագործության մասին հաղորդում են ներկայացրել Գլխավոր դատախազություն, որտեղ իշխանություններին մեղադրում են իշխանությունը յուրացնելու եւ սահմանադրական կարգը տապալելու մեջ:

«Մեր գործողությունները որպես պատգամավոր որեւէ կերպ չեն հակասում ոչ Սահմանադրությանը, ոչ գործող օրենսդրությանը, ոչ էլ դուրս են պատգամավորի լիազորություններից ու գործառույթներից: Եթե ես արձանագրում եմ, որ մեր գործողությունները որեւէ կերպ օրենքի դաշտից դուրս չեն, ապա ի՞նչ անհանգստանալու մասին կարող է խոսք լինել:

Ինչ վերաբերում է այլ կուսակցությունների գործողություններին, ապա իրենց իրավունքն է վարվել այնպես, ինչպես ճիշտ են համարում»,-ընդգծեց նա: