Գույքահարկի բարձրացումը կարող է խթանել բիզնեսի ակտիվությունը. Բաբկեն Թունյան

Գույքահարկի բարձրացումը կարող է խթանել բիզնեսի ակտիվությունը: Այս մասին հունիսի 30-ին լրագրողների հետ հանդիպման ժամանակ ասաց ԱԺ Տնտեսական հարցերով մշտական հանձնաժողովի նախագահ, իշխող «Իմ քայլը» դաշինքի պատգամավոր Բաբկեն Թունյանը:

Նրա խոսքով՝ բիզնեսի եկամտաբերության մակարդակը շատ ավելին է, քան գույքահարկի մակարդակը, ուստի տնտեսվարող սուբյեկտների համար փոփոխությունը զգալի չի լինի: «Դրույքների փոփոխությունը կհանգեցնի նրան, որ դա կխթանի չօգտագործվող գույքի օգտագործումը, ինչը կարող է բիզնեսի նորեկներին հնարավորություն ընձեռել ավելի ակտիվորեն եւ դյուրությամբ հարմարվել տնտեսական գործունեությանը»,- նշեց նա:

Բաբկեն Թունյանը վստահ է, որ խոսակցությունները, թե իբր հարկը բարձրանում է հատկապես ճգնաժամի ֆոնին, մանիպուլյացիա է, քանի որ փոփոխությունները նախաձեռնվել էին դեռեւս անցյալ տարի: «Հիմա, հակառակը, փորձում ենք հետեւանքները մեղմել, քանի որ հաստատված է, օրինակ, բնակարանի համար մինչեւ 40 մլն դրամի շեմ, որը կլինի 1 տոկոսից ոչ բարձր, չնայած նախապես առաջարկվում էր այլ չափանիշներ հաստատել, ինչը կարող էր հանգեցնել ավելի բարձր հարկադրույքների: Դրանից բացի, հանրային քննարկումների ընթացքում առաջարկվում էին հարկման ավելի բարձր բանաձեւեր, ինչից մենք հրաժարվել ենք: Քաղաքացիները նոր դրույքներով հարկը կսկսեն վճարել 2021 թվականից, իսկ բարեփոխումը կավարտվի 6 տարի հետո, ինչը թույլ կտա լրացուցիչ եկամուտներ գեներացնել, որը կծախսվի սոցիալական ծառայությունների մակարդակի բարձրացման ուղղությամբ: Ինչ վերաբերում է սոցիալապես խոցելի խմբերին եւ թոշակառուներին, ապա տեղական ինքնակառավարման մարմինները հաստատված դրույքը 10 տոկոսով մեղմելու եւ որոշակի դեպքերում անհատական մոտեցում կիրառելու մեխանիզմներ ունեն»,- շեշտեց իշխող դաշինքի պատգամավորը:

Նա հավաստիացրեց, որ իշխանությունները չեն մտահոգվում այն կապակցությամբ, որ հնարավոր է սոցիալական լայն դիմադրություն, «քանի որ խնդիրն ավելի շուտ հաղորդակցության մեջ է եւ մարդկանց փոփոխությունների նպատակներն ու փուլայնությունը բացատրելու անհրաժեշտության»:

Թունյանը հայտարարեց, որ մարզերում միջին հարկը կկազմի 5 հազար դրամ, իսկ այդ կարգի տների մեծ մասի համար՝ 3 հազար դրամ: «Կարծում եմ, որ սա տանելի ֆինանսական բեռ է, իսկ եթե ոչ, ապա խնդիրը բնակչության եկամուտների բարձրացման անհրաժեշտության մեջ է: Ամբողջ երկրում ընդամենը միայն 9500 բնակարան կա, այսինքն՝ 2,5 տոկոսը, որոնց համար վճարվելու է 64 հազար դրամից ավելի հարկ»,- եզրափակեց նա՝ լռելով Երեւանի բնակիչների համար հարկի կտրուկ բարձրացման մասին, որոնց մեծ մասը բնակվում է ոչ թե նորակառույցներում, այլ խորհրդային բնակֆոնդում, եւ հիմա պետք է վճարի մի քանի անգամ ավելի: