«American Airlines» ավիաընկերությանը դատի են տվել ռասայական խտրականության համար
Արիզոնա նահանգից աֆրոամերիկացի եւ եւս չոր մարդ միասնական դատական հայց են ներկայացրել ընդդեմ «American Airlines» ավիաընկերության ռասայական խտրականության պատճառով չվերթից սեւամորթ ուղեւորին հեռացնելուց հետո, հաղորդում է NBC News-ը:
Ըստ մեղադրական կողմի՝ սպիտակամաշկ բորտ-ուղեկցորդուհին հրամայել է աֆրոամերիկացի Էլջին Բենքսին հավաքել իրերն ու լքել ինքնաթիռը, երբ նա փորձել է նստել մեկ ուրիշ նստատեղին:
Սակայն ընկերության մամուլի ծառայությունում հայտարարել են, որ առաջադրված մեղադրանքը լիարժեք կամ մանրամասնորեն չի նկարագրում միջադեպը:
Ըստ գործի նյութերի՝ մայիսի 31-ին նստելով Լոս Անջելես-Ֆենիքս չվերթն իրականացնող ինքնաթիռ՝ Բենքսը հարցրել է բորտ-ուղեկցորդուհուն՝ կարո՞ղ է արդյոք փոխել իր տեղը:
Նրան խնդրել էին սպասել մինչեւ նստեցման ավարտը: Երբ բոլոր ուղեւորներն արդեն գտնվում էին ինքնաթիռում, նրանք սկսել էին փոխել իրենց տեղն ու Բենքսը հարցրել էր՝ կարո՞ղ է արդյոք նստել ինքնաթիռի վերջին շարքերում:
Բորտ-ուղեկցորդուհին կոպիտ կերպով հրամայել է նրան վերադառնալ իր տեղը, որից հետո նա առարկել է, իսկ որոշ ժամանակ անց նրանց մոտեցել են անվտանգության աշխատակիցները, որոնք հեռացրել են տղամարդուն չվերթից:
Այդ դեպքը հարցեր է առաջացրել ուղեւորների մոտ, որոնք այդպես էլ չեն հասկացել, թե որն էր Բենքսի մեղքը եւ ավելի ուշ համաձայնվել են ներկայանալ միջադեպի վկաների դերում:
Ի պատասխան՝ ավիաընկերությունն արգելել է նրանց օգտվել իրենց ծառայություններից:
Ընդ որում՝ ըստ «American Airlines»-ի հայտարարության՝ ուղեւորը փորձել է փոխարինել իր տեղն առաջին դասում, սակայն նրան հրամայել են նստել իր տեղում, քանի որ նա իրավունք չուներ տեղափոխվել այնտեղ: