Մալթայի օդանավակայանը կգործի հուլիսի 1-ից

Մալթայի օդանավակայանը ուղևորափոխադրումները կվերսկսի հուլիսի 1-ից: Այս մասին կիրակի օրը հայտարարել է Մալթայի վարչապետ Ռոբերտ Աբելան, հաղորդում է «Եվրոպեյսկայա պրավդան»՝ հղում անելով Reuters-ին:

Զբոսաշրջությունը կազմում է Մալթայի տնտեսության գրեթե մեկ քառորդը, և հյուրանոցատերերը պնդում են, որ կառավարությունը վերաբացի օդանավակայանը, հակառակ դեպքում երկրին զանգվածային գործազրկություն է սպառնում:

Միջերկրածովյան հարավային կղզում գրանցվել է կորոնավիրուսային վարակի 600 և մահվան 9 դեպք, որից հետո իրականացվել է բնակչության զանգվածային թեստավորում և վարակակիրների շփման շրջանակի վերահսկում: Կղզում մայիսի կեսերին բացվել են խանութներն ու ռեստորանները, բայց եկեղեցիներն ու դպրոցները դեռ փակ են: Բարերն ու մարզադահլիճները կվերաբացվեն հաջորդ ուրբաթ:

Երկրի կառավարությունը յուրաքանչյուր աշխատողի համար ամսական վճարում է 800 եվրո, որպեսզի կանխի ընկերություններում աշխատակիցների կրճատումները, և հայտարարել է, որ այդ սխեման կգործի մինչև տնտեսության վերականգնումը:

Իշխանությունները բանակցում են COVID-19-ի ցածր ցուցանիշներ ունեցող երկրների հետ «անվտանգ միջանցքներ» ստեղծելու համար: Այդ երկրների թվում են Լյուքսեմբուրգը, Նորվեգիան, Սերբիան, Սլովակիան, Ավստրիան, Չեխիան, Լատվիան, Լիտվան և Իսրայելը: