Կգա մի օր՝ Արման Սարգսյանը կդատապարտվի սուտ մատնության, պաշտոնական դիրքի չարաշահման համար․Ռ Հայրապետյան. «Առավոտ»

ՀՖՖ նախկին նախագահ Ռուբեն Հայրապետյանը հարցազրույց է տվել «Առավոտ» օրաթերթին։ Այն ամբողջությամբ ներկայացնում ենք ստորեւ․

Ոստիկանությունը հաղորդագրություն է տարածել, թե «փաստական տվյալներ են ձեռք բերվել, որ ՀՖՖ նախկին նախագահը, իր կարգադրիչ և այլ լիազորությունները կազմակերպության շահերին հակառակ օգտագործելով, Երևանի քաղաքապետարանի համապատասխան պաշտոնատար անձանց միջոցով կազմակերպել է ֆեդերացիայի 26 հազար քառակուսի մետրից ավելի հողակտորը իր և մերձավորների անվամբ գրանցելու գործընթաց»: Քանի որ ակնհայտ է, թե հասցեատերը Դուք եք՝ ի՞նչ կասեք այս պնդման առնչությամբ:

Դեռ փետրվարին եմ հայտնել իմ կարծիքը ոստիկանապետ Արման Սարգսյանի մտածելակերպի եւ մասնագիտական ունակությունների մասին: Նա այժմ անձնական խնդիր է լուծում: Բայց ինքն օրինական որեւէ հիմք չունի, որ կարողանա ինձ ինչ որ բան թելադրել: Ու մեղք են այն ոստիկանները, որոնք կատարում են նրա անօրինական հրամանները եւ ապօրինի գործեր հարուցում:

Ինչ վերաբերում է այդ հողակտորին. 2001 կամ 2002 թվականին՝ լավ չեմ հիշում, այն անհատույց հատկացվել է ՀՖՖ-ին մանկապատանեկան դպրոց կառուցելու համար: Հողակտորը ճանապարհ է եղել ու անջատված՝ օազիսի պես կտրված է եղել հետագայում կառուցված ֆուտբոլի ակադեմիայից: Այն 2010-ին է կառուցվել՝ այդ ողջ ընթացքում մնացած հողակտորը երբեք չի օգտագործվել: ՀՖՖ-ն նպատակահարմար է գտել հրաժարվել այդ հողակտորից 2014-ին եւ այն հանձնվել է Երեւանի քաղաքապետարանի ենթակայությանը: Վերջինս այն հաջորդ տարի աճուրդով վաճառել է՝ դեռ մի բան էլ ավելի գնով: Այդ թվում նաեւ ես եմ մի փոքր մաս գնել, նաեւ իմ մտերիմները: Հող եմ գնել աղջկաս համար տուն կառուցելու համար՝ օրենքի սահմաններում, աճուրդով, հայտարարված գնից 50 տոկոսով էլ ավելի գնով ու պետությանը մուծել գումարը: Որեւէ անօրինական բան չի եղել:

Այդ մարդիկ չեն հասկանում, որ շուկայական գինը կարող է տարբերվել աճուրդի վաճառքի գնից: Այս էլ որերորդ դեպքն է … 800 մլն դրամ գումարը շատ սիրում է Արմանը: 3-րդ անգամ է, որ նույն անհեթեթ չափն են նշում՝ ի՞նչ եղավ Զեյթուն կահույքի ֆաբրիկայի 800 մլնը: Ի՞նչ եղավ մարզադաշտի 800 մլնը… Բայց արդեն ընտանիք են մտնում՝ վատ բան են անում: Խորհուրդ եմ տալիս՝ իմ ընտանիքի անդամների հետ գործ չունեք: Այս էլ երկրորդ դեպքն է՝ հիմա էլ աղջկաս տանը հասան: Ինձ հետ հարց ունեք՝ խնդիր չկա, պատրաստ եմ կռիվ տալ: Բայց երեխեքիս հետ գործ չունեք:

Ոստիկանության հաղորդագրության մի դրվագ էլ մասնավորապես հետեւյալն է. «ՀՖՖ նախագահը, հափշտակություն կատարելու նախնական դիտավորությամբ, իրեն պատկանող հանքային ջրերի գործարանի հաշվեկշռում գտնված 2006 թվականի արտադրության «PorcheCayenne Turbo» մակնիշի ավտոմեքենան 2017 թվականին առուվաճառքի պայմանագրով 2 միլիոն դրամով օտարել է իր հետ փոխկապակցված անձին»:

Ինձ պատկանող գործարանն այն կարող էր օտարել զրո դրամով: Իմ սեփականությունն է՝ իրենց ի՞նչ գործն է, թե ի՞նչ գնով եմ օտարել, ո՞նց են գնահատել այդ մեքենան: Պետությանը ոչ մի վնաս չեմ տվել:

Սակայն հաղորդագրությունը շարունակություն ունի, որ այդ գործարքից 2 ամիս անց «ֆեդերացիայի աշխատակիցներից մեկը կնքել է հիշյալ ավտոմեքենայի գնման պայմանագիր, ինչի արդյունքում տվյալ պահին 6 միլիոն 500 հազար դրամ արժողությամբ մեքենան ֆեդերացիան գնել է անհամեմատ բարձր՝ 25 միլիոն 75 հազար դրամով»:

Ով որ գնել է՝ նա էլ վաճառել է: Երբ հետաքննություն սկսվեց՝ նոր հետաքրքրվել եմ, որ գնելուց հետո վերանորոգել է, լիքը ծախսեր արել, աշխատանք կատարել ու վաճառել: Մեքենան գտնվել է Արմեն Գյուլբուդաղյանցի մոտ… Եվ մամուլում ժամանակին հաղորդվել է, որ այդ մեքենան թալանվել է (2018-ի նոյեմբերին shamshyan.com-ը հաղորդել էր, որ թալանել են ֆուտբոլի Հայաստանի ազգային հավաքականի գլխավոր մարզչի Porsche Cayenne-ը, ավտոմեքենայի առջևի լուսարձակները գողացել են. խմբ.): Թող նաեւ ուսումնասիրեն, թե մեքենայի գնորդն ով է: Ֆուտբոլի ակադեմիայի այսօրվա տնօրենի ընկերը, Արմեն Մելիքբեկյանի ընկերը:

… Այս ամենը հերթական շանտաժն է: Եվ կգա մի գեղեցիկ օր, որ Արման Սարգսյանը կդատապարտվի սուտ մատնության, պաշտոնական դիրքի չարաշահման եւ ապօրինի գործողությունների հոդվածներով:

Ասենք, 6-րդ վարչությունից Գոռ անունով մեկը կանչել էր իմ բարեկամներից մեկին, թե օգնիր, Հայրապետյանի վրա ցուցմունք տուր՝ մենք էլ հետագայում քեզ կօգնենք: Ինձնից գույք առած մարդուն ասում են՝ գրի, որ ինքը քեզ ստիպելով է վաճառել: Կամ այն գործով, որով կալանք է սահմանվել՝ գնացել են այդ մարդու, որը մեզնից փող էր գողացել՝ նրա ծնողներին ասել՝ խոստանում ենք, մենք ձեր փողերը հետ կտանք՝ դուք բողոքեք: 10 օր առաջ գիտեի, որ գնում, համոզում են… վերջը համոզեցին: Մարդն ասում է, որ փող է գողացել՝ մինչեւ հիմա նրա վրա գործ չեն հարուցել, իսկ մեր վրա քրգործ են սարքում: Այո, մեր սխալը այն է եղել, որ ժամանակին այդ գողության կապակցությամբ իրավապահներին չենք հայտնել: Մայրն էր ինձ խնդրում, թե կբերենք՝ գումարները կվերադարձնենք ու մասամբ վերադարձրեց էլ: Բայց այն գումարները, որ մինչեւ հիմա չի տվել՝ այ, հիմա դրանք էլ հետ կվերցնենք: Իրենց տղան կդատվի, իրենք էլ սուտ ցուցմունք տալու համար կդատվեն:

Օրակարգը փորձում են լցնել Հայրապետյանի մասին լուրերով, փոխանակ զբաղվեն իրենց բուն գործով՝ մարդիկ են կոտորվում, անվերահսկելի իրավիճակ է: Ուշադրություն շեղելու համար նրանից, որ ամբողջովին ձախողել են այս վարակի դեմն առնելու աշխատանքը՝ հորինովի քրեական պատմություններով են փորձում լցնել օրակարգը՝ մեկին մեղադրում են, որ չի թողել դպրոց փակվի, մյուսին, որ կանաչ տարածքի տեղը սրճարան բացվի, ինձ, որ գողացված փողերն եմ փորձել գոնե մասամբ վերադարձնել…

Ոստիկանապետը իր աշխատանքը պատշաճ չի կատարում՝ կարանտինի ողջ ընթացքում ոստիկանության անհրաժեշտ աշխատանքը մարդիկ չտեսան: Կամ գուցե իրեն թվում է՝ ե՞ս եմ Գավառի հիվանդանոցում իր գլխին հարվածել… Ազնվորեն՝ այնտեղ չեմ եղել: Բայց օրական 10 մեղադրանք առաջադրեք՝ դրանից կորոնավիրուսի դեմն առնելո՞ւ եք: Եթե իմանամ՝ այդպես է, թող օրը 50 հոդված տան:

Օրը մի հիմարություն հաղորդում են, ես էլ մեկնաբանություններ եմ տալիս: Ոչ, այլեւս այդպես չի լինելու: Թող դիմեն փաստաբաններիս՝ նրանք կպատասխանեն: Ես ապօրինի ոչ մի բան չեմ արել: