ԱՄՆ-ում Apple-ի և Google-ի տեխնոլոգիաների օգնությամբ սկսել են հետևել կորոնավիրուսով անձանց շփումներին
Առնվազն երեք ամերիկյան նահանգներ սկսել են օգտագործել նոր կորոնավիրուսով վարակված անձանց շփումներին հետեւող տեխնոլոգիա, որը մշակել են Apple-ը եւ Google-ը, հայտնում է ՏԱՍՍ-ը՝ հղում անելով CNBC-ին։
Նրա տեղեկատվությամբ՝ Ալաբամայի, Հյուսիսային Դակոտայի եւ Հարավային Կարոլինայի իշխանությւունները հավանության են արժանացրել այդ նահանգների տարածքում բջջային հավելվածների կիրառումը, որոնք օգտագործում են Apple-ի եւ Google-ի համատեղ ստեղծած տեխնոլոգիան։ Ապրիլի սկսզբին ընկերությունները հայտարարել էին այն մասին, որ միավորում են ուժերը՝ կորոնավիրուսով վարակված անձանց շփումներին հետեւելու հարցում բուժաշխատողներին օգնելու նպատակով։ Նրանք մշակել են տեխնոլոգիա, որը թույլ է տալիս դա անել Bluetooth անլար կապի միջոցով։
Ավելի վաղ նշվում էր, որ ընկերությունները տվյալ դեպքում չպետք է զբաղվեն հավելվածների մշակմամբ, այլ ընդամենը կտրամադրեն հենց տեխնոլոգիան եւ դրա ճշգրիտ աշխատանքի համար գործիքներ։ Նշված նահանգներում համապատասխան ծրագրերը ստեղծվել են բժիշկների եւ առողջապահության ոլորտում աշխատող կազմակերպությունների համար հավելվածներ մշակողների կողմից։ Ինչպես հստակեցնում է հեռուստաալիքը, մինչ այժմ տեխնոլոգիան ստանալու հայտ է ներկայացվել 22 երկրների իշխանությունների եւ ամերիկյան մի շարք նահանգների կողմից։
Երկու ընկերություններն էլ առաջիկա ամիսներին մտադիր են իրենց աշխատանքները վերածել բարդ բազմաֆունկցիոնալ գործիքի՝ նախատեսված հիվանդների շփումներին հետեւելու հարցում բժիշկներին օգնելու համար։ Նախագծի այս փուլը կյանքի կոչելու համար կպահանջվի մասնակիցների էապես մեծ խումբ։
Ըստ Ջոնս Հոպկինսի համալսարանի, որը հաշվարկներ է կատարում դաշնային եւ տեղական իշխանությունների տվյալների հիման վրա, ԱՄՆ-ում գրանցվել է կորոնավիրուսով վարակման ավելի քան 1,53 միլիոն դեպք, մահացել է ավելի քան 92 300 մարդ։