Եթե բավական վտանգավոր ոլորտներ սկսել են աշխատել, ապա ինչի՞ ենք մենք տանը, լավ, ինչքա՞ն ենք մենք տալը մնալու. Սարգիս Գրիգորյան
Եթե բավական վտանգավոր ոլորտներ սկսել են աշխատել, ապա ինչի՞ ենք մենք տանը, լավ, ինչքա՞ն ենք մենք տալը մնալու: Այս մասին այսօր՝ մայիսի 20-ին, կառավարության շենքի մոտ բողոքի ակցիայի ժամանակ լրագրողների հետ զրույցում նշեց դերասան Սարգիս Գրիգորյանը՝ խոսելով ռեստորանային համալիրների, հանդիսությունների սրահների սեփականատերերի, աշխատակիցների, երգիչների, երաժիշտների, հանդիսավարների չաշխատելու մասին:
Սարգիս Գրիգորյանը նշեց, որ շատերը, օրինակ, հարսանիք անելու համար պարտքեր են վերցրել, ու հիմա հնարավոր չէ այն չկազմակերպել: Նա տեղեկացրեց, որ ինքը 3 ամսվա համար պետությունից 68 հազար դրամ է ստացել որպես աջակցություն, սակայն դրանով հնարավոր չէ երեք երեխա պահել: «Ես չեմ եկել փող մուրալու, եկել եմ ասելու՝ եկեք ելքեր գտնենք աշխատելու, գործելու»,-ասաց Գրիգորյանը:
«Հարցեր կան, որոնց պատասխանը կցանկանայինք ստանալ, քննարկել ու հարցը լուծել, այս հարցը մի օրվա, մի ժամվա չէ: Ասում են՝ այս ամենը երկար է տևելու, բա մենք ինչ ենք անելու, եթե մեր աշխատանքը սեզոնային է»,- ասաց Գրիգորյանը:
Հարցին, թե իրեն չի՞ մտահոգում, որ ռեստորանների աշխատելը կարող է հանգեցնել վարակի արագ տարածմանը, դերասանը պատասխանեց. «Ինչի ես մա՞րդ չեմ, որ չմտահոգի: Կորոնովիրուսից զատ գոյություն ունի տնտեսություն, գոյություն ունեն հիվանդություններ, որոնք կարող են առաջանալ կորոնավիրուսի այս նյարդային վիճակի հետեւանքով: Նեւրոզների թիվն է աճում, բաժանությունները, տարբեր հիվանդություններ: Մարդը պետք է աշխատի: Եթե բացել եք ավելի վտանգավոր ոլորտներ, մենք ինչո՞ւ ենք փակ: Օրինակ, մետրոն, տրանսպորտը, մանկապարտեզները:
Իմ պարապուրդի մեջ գտնվելն իրենց վատ ա: Քանի՞ մասնագիտություն շեշտեմ, որը պարապուրդի մեջ է եւ կապված է այս ոլորտի հետ: Նույնիսկ եկեղեցին է պարապուրդի մեջ շատ դեպքերում՝ կնունքներ, հարսանիքներ: նույնիսկ եկեղեցին է տուժում դրանից»:
Հիշեցնենք, որ այսօր ռեստորանային համալիրների սեփականատերերն ու աշխատակիցների, ներկայացուցիչների Կառավարության շենքի մոտ բողոքի ակցիա էին իրականացնում, որի ժամանակ ոստիկանները մասնակիցներից մի քանիսին բերման ենթարկեցին, որոնց շարքում էր նաև Սարգիս Գրիգորյանը: