Լուկաշենկոն հիշեցրել է ԵԱՏՄ ընդհանուր շուկայում գազի փոխադրման գների չլուծված հարցի մասին
Բելառուսի նախագահ Ալեքսանդր Լուկաշենկոն այսօր Եվրասիական բարձրագույն տնտեսական խորհրդի նիստի սկզբում նշել է, որ ԵԱՏՄ ընդհանուր շուկայում գազի փոխադրման ծառայությունների գնագոյացման հարցը մնում է չլուծված, փոխանցում է ԲԵԼՏԱ-ն:
«ԵԱՏՄ ընդհանուր շուկայում գազի փոխադրման ծառայությունների գնագոյացման հարցը մնում է չլուծված: Մենք արդեն մի քանի տարի է, ինչ չենք կարողանում հանգել վերջնական փոխընդունելի լուծման: Ավելին, խնդրի արդիականությունն անընդհատ աճում է: Այսօր մենք պետք է գտնենք բոլորին անհրաժեշտ կոնսենսունսը»,- շեշտեց Բելառուսի նախագահը:
Խոսելով նիստի օրակարգի մասին՝ նա նշեց, որ դրա հիմնական հարցը մինչեւ 2025 թվականը Եվրասիական տնտեսական ինտեգրման զարգացման ռազմավարական ուղղությունների ընդունումն է: «Այս փաստաթուղթը եւ՛ հարաբերությունների խորացմանն ուղղված գործողությունների ծրագիր է, եւ՛ յուրատեսակ շրջադարձային կետ մեր երկրների տնտեսությունների զարգացման տեմպի վերականգնման եւ ավելացման համար»,- ասել է Ալեքսանդր Լուկաշենկոն:
Նախագահը նշել է, որ փաստաթղթի նախապատրաստումը դժվար էր առաջ գնում, բայց, ընդհանուր առմամբ, կողմերին հաջողվել է համաձայնեցված որոշումների հասնել ինտեգրման խորացման բոլոր ուղղություններով: Այս կապակցությամբ նա շնորհակալություն է հայտնել մասնակիցներին՝ կառուցողական մոտեցման համար: