Դանիացի հնագետները Եվրոպայի կենտրոնում «մեռյալ գոտի» են հայտնաբերել

Եվրոպայի ամենակենտրոնում, ժամանակակից Գերմանիայի Այֆել լեռնազանգվածում տեղակայված Լախերզե գեղատեսիլ լիճը մի ժամանակ եղել է Լախեր հրաբխի խառնարանը, որը զգալի սառնամանիք է հրահրել 13 000 տարի առաջ։ Հրաբխի մասին, որը ժամանակին իր շուրջը «մեռյալ գոտի» է առաջացրել, գրում է «Հանրամատչելի մեխանիկա»-ն։

Ըստ Դանիայում Օրխուսի համալսարանից հնագետ Ֆելիքս Ռիդեի՝ խոսքը մի հրաբխի մասին է, որը լրջորեն ազդել է ուշ պալեոլիտի ժամանակների Եվրոպայի բնակիչների վրա։ 13 000 տարի առաջ Լախերզե լճի տեղում գոյություն է ունեցել հրաբուխ, որը խթանել է ավելի զանգվածային աղետ, քան այն, որ ոչնչացրել է Պոմպեյը։

«Հրաբուխն արտանետել է մոխրի այնքան մեծ խավալ, որ դրա հարակից շրջանները մնացել են հրաբխային նյութի 50 մետրանոց շերտի տակ։ Մոխրի մանր մասնիկները տարածվել են Եվրոպայով մեկ, ժայթքման հետեւանքն այնքան նշանակալի է եղել, որ առաջացել է ցրտահարություն, որը տեւել է երկար տարիներ։ Կենդանիները, որոնք կերել են մոխրով պատված բուսականությունը, տառապել են ատամների ու ոսկորների հիվանդություններից, այդ պատճառով դրանց թիվը խիստ կրճատվել է, ինչն, իհարկե, ազդել է նաեւ մարդկանց վրա, որոնք որս են արել այդ վայրերում»,- պատմել է Ռիդեն։

Գիտնականը նշել է, որ մարդիկ 50, նույնիսկ 100 տարով լքել են հրաբխի ժայթքման վայրը։ Սակայն հարյուր տարի անց էլ հրաբխի շուրջ պահպանվել է մոխրի շերտը, որը Լախերի շուրջ տարածքը դարձրել է մի տեսակ «մեռյալ գոտի»: