«Իրար չհասկացանք». Վանաձորի Երևանյան խճուղում երիտասարդի սպանության գործով վատառողջ ամբաստանյալը չի ընդունում ծանր մեղադրանքը
«Վանաձոր» ՔԿՀ-ում ապրիլ ամսին մի քանի օր հացադուլ հայտարարած և ԱԺ անկախ պատգամավոր Արման Բաբաջանյանի հետ հանդիպած կալանավորներից է Սարգիս Գ.-ն:
Սարգիսի խնդիրը բազմաշերտ է, այն ներառում է ինչպես խափանման ներկա միջոցի՝ կալանավորման փոփոխումը, անազատության հետ չկապված խափանման միջոցի ընտրությունը, այնպես էլ կատարված արարքին իր մասնակցության հարցը:
Սարգիս Գ.-ի գործը ներկայումս դատաքննական փուլում է: Գործը քննվում է Լոռու մարզի ընդհանուր իրավասության դատարանում Սուսաննա Գզոգյանի նախագահությամբ:
Բացի Սարգիսից՝ ամբաստանյալի աթոռին է նաև Մելսիկ Ա.-ն: Ընդ որում՝ դեպքի՝ սպանության հաջորդ օրը Մելսիկը հայտնաբերվել ու արգելանքի տակ էր առնվել և մանրամասներ էր հայտնել սպանության վերաբերյալ՝ նշելով, թե ինքը մենակ է կատարել այն:
Դեպքը տեղի է ունեցել 2016 թվականի նոյեմբերի 20-ին, ժամը 22-ի սահմաններում: Իսկ ժամը 22-ն անց 30-ին ոստիկանության Լոռու մարզային վարչության օպերատիվ կառավարման կենտրոնում ահազանգ է ստացվել, որ Վանաձորի Երևանյան խճուղի 88 հասցեում՝ Վանաձորում որպես «Ծառի մոտ» հայտնի վայրում, երիտասարդի դի կա:
Պարզվել է, որ սպանվածը 21-ամյա վանաձորցի Հարություն Ա.-ն է:
Հաջորդ օրը՝ նոյեմբերի 21-ին, սպանության կասկածանքով արգելանքի տակ առնված 20-ամյա Մելսիկ Ա.-ն դեպքի կոնկրետ վայրը մատնացույց անելու գործողության ժամանակ հայտնել է, թե ինքն ու տուժողը խոսակցության ժամանակ «իրար չեն հասկացել, քաշքշել են», ինչի ընթացքում ինքը դանակի հարվածներ է հասցրել տուժողին: Դրանից հետո տեսել է, որ տուժողը մի քանի քայլ հեռացավ, ինքն էլ հեռացել է հակառակ ուղղությամբ՝ ճանապարհին հանցագործության գործիքը նետելով գետը:
Գործի բացահայտման ընթացքում արգելանքի տակ են առել նաև Սարգիս Գ.-ին: Մեղադրանքի ծանրությունն ու նկարագրությունը փոխվել են:
Ըստ մեղադրանքի՝ 2016 թվականի նոյեմբերի 20-ին, ժամը 22-ի սահմաններում Վանաձորի Երևանյան խճուղում գործող ավտոտեխսպասարկման կետի հարակից տարածքում Մելսիկ Ա.-ն Սարգիս Գ.-ի հետ միասին վիճաբանել է տուժող Հարությունի հետ, և առանց նախնական համաձայնության, տուժողին կյանքից զրկելու դիտավորությամբ նրանք երկուսով՝ խմբով, իրենց մոտ եղած դանակներով հարվածներ են հասցրել տուժող երիտասարդի մարմնի տարբեր մասերին, պատճառել են կտրած-ծակած ու կտրած՝ թվով 15 վերքերի տեսքով մարմնական վնասվածքներ և սպանել են նրան:
Սարգիս Գ.-ն չի ընդունում սպանությանն իր մասնակցությունը: Իսկ Մելսիկ Ա.-ն, ըստ նրա շահերի պաշտպան, փաստաբան Գուրգեն Հարությունյանի՝ ընդունելով, որ ինքն է սպանել տուժողին, չի ընդունում սպանությունը խմբի կազմում՝ Սարգսի հետ կատարելու հանգամանքը, Մելսիկը պնդում է, որ միայն ինքն է մեղավոր սպանության համար, բայց ոչ՝ ծանրացուցիչ հանգամանքներում կատարված սպանության, ո՛չ ՀՀ քրեական օրենսգրքի 104 հոդվածի 2-րդ՝ ծանր մասով:
Ըստ Սարգիս Գ.-ի շահերի պաշտպան, փաստաբան Հովիկ Արսենյանի՝ իր պաշտպանյալին սխալ ու անհիմն մեղադրանք է առաջադրված: Գործով միայն մեկ վկա է ցուցմունք տվել, թե տեսել է՝ ինչպես է տուժողին հարվածել նաև Սարգիսը: Այդ վկան, ըստ պաշտպանի, հիմա հայտնի չէ, թե որտեղ է: Պաշտպանն ընդգծեց՝ եթե անգամ ծայրահեղ դեպքում արժանահավատ համարվի այս մեկ վկայի ասածը, ապա Սարգիսը կարող է մեղադրվել ոչ թե դիտավորյալ, այն էլ՝ խմբի՛ կազմում դիտավորյալ սպանության համար, այլ՝ ըստ հետևանքի, ըստ պատճառված մարմնական վնասվածքի ծանրության աստիճանի, օրինակ՝ տուժողի առողջությանը միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 1-ին մասով: Մինչդեռ նախաքննական մարմինը առանց հիմնավոր ու բավարար ապացույցների՝Մելսիկին ու Սարգիսին նույն՝ առանձնապես ծանր մեղադրանքն է առաջադրել՝ խմբի կազմում դիտավորյալ սպանություն՝ ՀՀ քրեական օրենսգրքի 104 հոդվածի 2-րդ մասի 7-րդ կետով:
Մեր զրույցում պաշտպան Հովիկ Արսենյանը նշեց, որ այս գործի քննությանը ներգրավված է նախաքննական փուլից: Նախաքննական մարմնին մի քանի միջնորդություն է ներկայացրել, այդ թվում՝ մեղադրանքի անհիմն լինելու վերաբերյալ:
«Վարույթն իրականացնող մարմինը արհամարհել է իմ կատարած միջնորդությունները, համարել է անհիմն: Ես նույն միջնորդությունները դատարանում եմ արել, և դատարանը արդարացիորեն բավարարել է դրանք: Լրացուցիչ քննչական գործողություններ են կատարվել, օրինակ՝ լրացուցիչ վկաներ են հարցաքննվել դատարանում, նաև՝ նշանակվել է դատաբժշկական լրացուցիչ հանձնաժողովային փորձաքննություն, քանի որ նախաքննության շրջանակներում տուժողի դիակի դատաբժշկական փորձաքննությունը թերի էր կատարվել, ամբողջական եզրակացություն չէր տրվել: Այս գործով սպանողը կա, նա ընդունում է, որ սպանել է տուժողին, բայց սպանության մեղադրանքում իմ պաշտպանյալին էլ են ներգրավել անհասկանալի ու անհիմն պատճառներով, մեղադրանքը ծանրացրել են անհիմն կերպով: Խմբի կազմում դիտավորյալ սպանության մեղադրանքի ապացույցներ գործում չկան, դա հիմնավորվում է նաև գործի դատաքննության ընթացքում»,- մեր զրույցում ասաց Հովիկ Արսենյանը:
Ինչ վերաբերում է Սարգիս Գ.-ի կողմից հայտարարված հացադուլին, ապա Սարգիսի պահանջը խափանման միջոցի փոփոխությունն է: Բանն այն է, որ Սարգիսը վատառողջ է: Մեր զրույցում Սարգիսի շահերի պաշտպան, փաստաբան Հովիկ Արսենյանն ասաց. «Սարգիսը բանակից ազատված է եղել խրոնիկական հիվանդություններ, մասնավորապես՝ մաշկային խնդիրներ ունենալու հիմքով: Որպես վատառողջ անձ՝ կորոնավիրուսի համավարակի ներկա պայմաններում նա ռիսկային խմբում է, բայց խափանման միջոց կալանավորումը պահպանվում է: Ես արդեն իսկ դատարանին գրավոր միջնորդություն եմ ներկայացրել Սարգիսի խափանման միջոց կալանավորումը փոխելու, անազատության հետ չկապված խափանման միջոց ընտրելու վերաբերյալ, առաջիկա դատական նիստում՝ մայիսի 13-ին, դատարանը պետք է քննարկի միջնորդությունը»:
Պաշտպանը հուսով է, որ քննարկման ընթացքում դատարանը ու դատավարության կողմերը հաշվի կառնեն իր պաշտպանյալի վատառողջությունը, խրոնիկական հիվանդությունների առկայությունը, հաշվի կառնեն նաև Եվրոպայի խորհրդի՝ խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի՝ մարտի 20-ին հրապարակած զեկույցը, որում կորոնավիրուսի համավարակի համատեքստում անդրադարձ է կատարված անազատության մեջ գտնվող անձանց. կարևորելով անազատության մեջ գտնվող անձանց կյանքի և առողջության իրավունքը, զեկույցում նշվում է, որ բոլոր իրավասու մարմինները պետք է համակարգված ջանասիրություն ցուցաբերեն, միջոցներ ձեռնարկեն՝ ազատությունից զրկելու այլընտրանքներին դիմելու համար:
Սարգիս Գ.-ի ու Մելսիկ Ա.-ի գործը Լոռու մարզի ընդհանուր իրավասության դատարանի վարույթում է արդեն տևական ժամանակ՝ 2017 թվականի հոկտեմբերից:
Աղբյուրը` 1in.am