Այնպիսի պահվածքով են մտել, որ չենք իմացել՝ ոստիկաննե՞ր են, թե՞ առեւանգողներ. Նորատուսի բնակիչ
Գեղարքունիքի մարզի Նորատուս համայքում երեկ՝ ապրիլի 28-ի գիշերը լարված է եղել. ոստիկանները բերման են ենթարկել մի քանի բնակչի։
NEWS.am-ի հետ զրույցում բնակիչներից մեկը պատմել է , որ դիմակավորված ոստիկանները մտել են եղբոր տուն, կոտրել են տան դուռը եւ վերջինիս բերման ենթարկել։
«Խուլիգանավարի մտել են տուն։ Այնպիսի պահվածքով են մտել, որ չենք իմացել՝ ոստիկաննե՞ր են, թե՞ առեւանգողներ։ Եղել են դիմակավորված։ Ամբողջ դռան վրա իրենց ոտքերի հետքերն են։ Դռները ջարդել են։ Ու սա կոչվում է իրավական պետություն։ 65 տարեկան հորս ծեփեցին գետնին ու եղբորս տնից տարան։ Մանկահասակ երեխա կար տանը, սակայն իրենց ոչինչ չի կանգնեցրել նման կերպ պահել իրենց»,-պատմեց բնակիչը։
Նա պնդեց, որ իր եղբայրը Գավառում տեղի ունեցած միջադեպերի հետ որեւէ կապ չի ունեցել. « Չգիտենք՝ ինչու տարան, դեռ բաց չեն թողել»։
Հիշեցնենք, որ երեկ՝ ապրիլի 28-ին, Գավառ քաղաքում փոխհրաձգություն է տեղի ունեցել մի խումբ գավառցի երիտասարդների եւ նորատուսցիների միջեւ։ Կրակոցների հետեւանքով մահացու հրազենային վիրավորում է ստացել քննիչ Զորիկ Պարոնիկյանը եւ Նորատուս համայնքի բնակիչ՝ «Նորատուսցի արջ» մականունով երիտասարդը։ Վիրավորում են ստացել եւս 4 քաղաքացի, որոնցից 2-ը տեղափոխվել էին Երեւանի հիվանդանոցներից մեկը, իսկ 2-ը տեղափոխվել էին Գավառի հիվանդանոց։
Սակայն դեպքն այսքանով չի ավարտվել։ Դեպքից ժամեր հետո սպանվածների հարազատները գնացել են Գավառի հիվանդանոց եւ ոստիկաններին չենթարկվելով մտել են հիվանդանոց՝ կոտրել պատուհաններ, դռներ ու հիվանդասենյակում դանակահարել նաեւ հրազենային վնասվածք ստացած 2 քաղաքացիներին եւ մեկ անձի։
Մամուլում շրջանառվող այն լուրերին, թե ՀՀ ոստիկանապետ Արման Սարգսյանն այդ միջադեպի ժամանակ եղել է հիվանդանոցում, ոստիկանությունը հերքեց, նշելով, որ ոստիկանապետը եղել է հնչած կրակոցների դեպքի վայրում՝ Ազատության պողոտայում։
Ինչպես կրակոցներով, այնպես էլ դրան հաջորդած դեպքերով կան բերման ենթարկվածներ։
ՔԿ-ի հաղորդագրության համաձայն այս պահին դեպքի առթիվ ձերբակալվել է 5 անձ եւ հարուցվել է քրեական գործեր, որոնք կքննվեն մեկ վարույթում։ Գեղարքունիքի ՔԿ-ն գործն ուղարկել է ՀՀ ՔԿ-ի ՀԿԳ վարչություն։