Չեմ պատրաստվում հրաժարական տալ. Մանե Գևորգյան

Չեմ պատրաստվում հրաժարական տալ: Այս մասին NEWS.am-ի հետ զրույցում ասաց ՀՀ վարչապետի մամուլի խոսնակ Մանե Գևորգյանը` մեկնաբանելով վարչապետ Նիկոլ Փաշինյանի ուղիղ եթերի նախապատրաստական կադրերի տարածման հետ կապված սկանդալից հետո իր հնարավոր հրաժարականի մասին լուրերը:

Խոսակցություններ կան, որ վարչապետի ուղիղ միացման ապահովման խմբի պատասխանատուն` Վարդան Հակոբյանը, կարղ է հրաժարական տալ, ճի՞շտ է արդյոք, որ կատարվածի պատասխանատվությունը նա միայնակ կրի, Մանե Գեւորգյանը պատասխանեց. «Ես չեմ ուզում մեկնաբանել, ես չեմ ուզում այստեղ մեղավորներ գտնել, եթե Վարդան Հակոբյանը գնա, ես ինձ մեղավոր կզգա՞մ` ոչ, իհարկե ոչ»:

Հարցին, թե ինչպես կմեկնաբանի նախօրեին Վարդան Հակոբյանի տարածած հայտարարությունը, որում Հակոբյանն ասում էր, որ ինքն ու Մանե Հակոբյանը ուղիղ եթերի ժամանակ նույն սենյակում են գտնվել և ինքը ասել է. «Մենք rec ենք», և իր պարտականությունների մեջ չի մտել այդ մասին տեղեկացնել վարչապետին, խոսնակը նշեց, որ չի ուզում ներքաշվել այս շարունակական երկխոսության մեջ:

«Չեմ ուզում պատասխանեմ, չեմ ուզում ներքաշվեմ այս շարունակական երկխոսության կամ մեղադրանքների մեջ և պատասխանել իրենց այն ձևով, որով իրենք են պատասխանում, որովհետև վստահ եղեք, ասելիքները շատ են, բայց չեմ ուզում»:

Դիտարկմանը, որ Վարդան Հակոբյանը իր հայտարարությունում կարծես կատարվածի համար պատասխանատվությունը դնում է խոսնակի վրա, Մանե Գևորգյանը պատասխանեց.

«Տեսնում եմ, տեսնում եմ, դա շատ բնութագրող է իրենց, բայց ես չեմ ուզում որևէ մեկնաբանություն տալ այս հարցով, չեմ ուզում շարունակություն լինի, երեկ վարչապետ Նիկոլ Փաշինյանն էլ ուղիղ եթերով խոսեց տեսանյութի տարածման վերաբերյալ, տեսնենք՝ դեպքերը ինչպես կզարգանան»:

Նշենք, որ ապրիլի 18-ին համացանցում տարածվել էին ՀՀ վարչապետ Նիկոլ Փաշինյանի ապրիլի 17-ի ուղերձի ոչ եթերային կադրերը:

Վարչապետի մամուլի խոսնակ Մանե Գևորգյանը հայտարարություն տարածեց, որ Հանրային հեռուստաընկերությունը, առանց վարչապետի աշխատակազմին տեղյակ պահելու, առնվազն 15 րոպե առաջ բաց կապուղի է ապահովել մյուս հեռուստաընկերությունների համար:

«Խիստ թափթփված աշխատելաոճի վկայություն է նաև վարչապետին տեղյակ չպահելը, որ նա եթերում է՝ թեկուզ փորձնական։ Միայն գործից անտեղյակը կարող էր ենթադրել, որ բաց կապուղի այլ հեռուստաընկերությունների համար անհրաժեշտ է ապահովել ուղերձից 15 րոպե առաջ։

Վարչապետի աշխատակազմը պատշաճ պարզաբանումներ է ակնկալում հեռուստաընկերությունից` տեխնիկական փորձի կադրերի արտահոսքի վերաբերյալ»,– գրել է նա:

Հանրային հեռուստանընկերությունից էլ հայտարարություն էին տարածել` փոխադարձ մեղադրանք ներկայացնելով վարչապետի աշխատակազմին. «Ինչ վերաբերում է ուղիղ եթերում ՀՀ վարչապետի ելույթներին՝ ընդգծենք, որ վարչապետի հետ ուղիղ աշխատանքը վերապահված է ոչ թե Հանրային հեռուստաընկերության աշխատակիցներին, այլ վարչապետի աշխատակազմին: Նկարահանման ամբողջ ընթացքին ներկա են եղել ինչպես վարչապետի խոսնակը, այնպես էլ տեղեկատվական վարչության աշխատակիցները:

Հեռուստաընկերության որևէ աշխատակից առանց հատուկ ցուցման կամ թույլտվության չի կարող թողնել իրեն վստահված տեղը: Առաջին ալիքի թիմը պատրաստ է մասնագիտական պատասխանատվություն կրել միայն իր գործառույթների համար»: