Հակաճգնաժամային միջոցառումներով արդեն բաշխվել է 3,67 մլրդ դրամ, ինչը մեր նախատեսածի 10 տոկոսից էլ պակաս է. Փաշինյան

Հակաճգնաժամային 9 միջոցառումները հերթով սկսում են գործել. այս պահի դրությամբ արդեն իսկ բաշխվել է 3 մլրդ 670 մլն դրամ: Այս մասին, այսօր՝ ապրիլի 9-ին, կառավարության նիստի ժամանակ նշել է ՀՀ վարչապետ Նիկոլ Փաշինյանը:

«Ուզում եմ ասել, որ այս թիվը մեր նախատեսածի 10 տոկոսից էլ պակաս է: Այն հընթացս կլրացվի: Կառավարությունն արդեն հրապարակել է էլեկտրոնային այն պատուհանը, որով քաղաքացիները կարող են ստուգել՝ արդյոք իրենք տվյալ սոցիալական ծրագրերի շահառու են, թե ոչ: Այս օրերին բազմաթիվ շահառուներ իրենց անունները չեն գտել, բայց ես ուզում եմ ասել, որ ամենօրյա ռեժիմով մենք թարմացնում եքն տվյալները: Իհարկե, բազան ամենաուշը հաջորդ շաբաթվա սկզբին կամբողջանա եւ ամբողջ աջակցության փաթեթները հասանելի կլինեն բոլոր շահառուների համար»,-ասաց Փաշինյանը:

Նա հավելեց, որ ՀՀ բանկերը շուրջ 290 հազար քաղաքացիների տվել են վարկային արձակուրդ՝9,3 մլրդ դրամի չափով: Վարկային արձակուրդ է տրվել նաեւ 5300 իրավաբանական անձանց՝ 15,4 մլրդ դրամի չափով:

«Բոլոր հիմքերը կան ասելու, որ այս պրոցեսը կշարունակվի: Այս որոշումները կայացվել են առանց կառավարության կողմից որեւէ վարչական ներգործության: Սա կարեւոր է, որովհետեւ ճգնաժամի սկզբին մեր շատ գործընկերներ մեզ փորձում էին դրդել, որ մենք վարչական որոշում կայացնենք, որոնք կպարտադրվեն բանկերին: Մենք որոշեցինք գնալ այլ ճանապարհով, եւ այն, որ բանկային համակարգը մեր հորդորներին արձագանքել է, նշանակում է, որ այդ զգայուն համակարգը վստահություն է տածում կառավարության կողմից իրականացվող հակաճգնաժամային քաղաքականության նկատմամբ»,-ասաց Փաշինյանը:

Ինչ վերաբերում է արտարժույթի շուկային, ապա մի քանի օրվա լարվածությունից հետո այն և ընդհանրապես բանկային համակարգը գտնվում են շատ հանդարտ վիճակում:

«Վերջին օրերին բանկային ավանդների աճի որոշակի միտում է նկատվում, ընդ որում, արդեն իսկ կան տեսանելի դեպքեր, երբ քաղաքացիների կողմից դոլարային ավանդները փոխարկվում են դրակայինի: 

Սա նշանակում է, որ կառավարության հակաճգնաժամային քաղաքականության նկատմամբ կա վստահություն»,-ասաց ՀՀ Վարչապետը: