Քաղավիացիայի գխավոր կոմիտեն նախկինում կաշառքով ավիաընկերություններ էր գրանցել, որոնք արտոնագրեր էին տվել ապօրինի զենք, թմրանյութ տեղափոխող օդաչուներին․ Շահեն Պետրոսյան

Երեկ մամուլում տեղեկատվություն տարածվեց, որ Միջազգային ավիացիոն կազմակերպությունը, այսպես ասած` լիցենզիայից զրկել է Հայաստանի Քաղաքացիական ավիացիայի պետական կոմիտեին: Լրատվամիջոցները գուժում էին, որ սա կարող է շատ վատ հետևանքներ ունենալ քաղավիացիայի և օդաչուների համար, որ նրանց կարող են զրկել լիցենզիայից և թույլ չտալ թռչել: Այս ամենում շատերը շտապեցին մեղադրել Քաղավիացիայի գլխավոր վարչության ղեկավար Տաթևիկ Ռևազյանին։

Քաղավիացիայի վարչության նախկին պետ Շահեն Պետրոսյանն ArmDaily.am-ի հետ զրույցում ասաց, որ իրականում նման կազմակերպություն գոյություն չունի։ Խոսքը Ավիացիոն անվտանգության եվրոպական գործակալության զեկույցի մասին է, որը ամենայն հավանականությամբ հերթական անգամ կարող է զգուշացրած լինել ՀՀ քաղավիացիայի ղեկավարությանը։

Պետրոսյանն ընդգծեց, որ իրականում պատմությունը նոր չէ, նման զգուշացումներ նախկինում էլ եղել են։ Տեղեկություններ կային, որ քաղավիացիան կաշառակերությամբ է զբաղված, կեղծ ավիաընկերություններ էր գրանցում, որպեսզի օդաչուներին արտոնագիր տա։ «Օդաչուն կարող է օդաչուի արտոնագիր ստանալ, եթե որևէ ավիաընկերությանն է կցված։ Թղթի վրա գրանցված «ավիաընկերությունները», որոշ դեպքերում զբաղվում էին ապօրինի գործունեությամբ (զենք, թմրանյութ), երկրներում, որտեղ հակամարտություններ կան կամ հսկողությունը ցածր մակարդակի վրա է։ Այն մասին, որ 2003 թ-ին Գվինեայում հայ օդաչուներ էին ձերբակալել ապօրինի զենք փոխադրելու համար՝ բոլորը կարծում եմ հիշում են։ Այստեղ օդաչուները մեղք չունեն, մեղավորները այն արկածախնդիր անձինք են, որ պատրաստ են նման պատվերներ կատարել»:

Պետրոսյանը պատմեց, որ ամեն ինչ սկսվել է այն ժամանակ, երբ սնանկացրին «Հայկական ավիաուղիներ» ընկերությունը։ Ավիաընկերությունը 650 օդաչու ուներ, սնանկանալուց հետո նրանք բոլորն անգործության մատնվեցին։ «Ոմանք կարողացան աշխատանք գտնել ռուսական, ղազախական, վրացական ավիաընկերություններում, մյուսերը մնացին անգործ, ու քանի որ չէին ուզում տաքսի քշել, ներքաշվեցին նման «գործարքների» մեջ։

Ավիացիոն անվտանգության եվրոպական գործակալությունը նախկինում էլ է նախազգուշացրել Հայաստանին, որ նման ապօրինի գործունեություն ծավալողներ կան։
Հարցին, թե ինչ կարող է անել գործակալությունը՝ Պետրոսյանն ասաց, իրականում ոչինչ, հատկապես, որ մենք ազգային փոխադրող չունենք։ «Նրանք խորհուրդ են տալիս, ասում են՝ այդ ընկերությունների արտոնագրերը ձեռքներից վերցրեք, նրանք կեղտոտ գործերով են զբաղված։ Հակառակ դեպքում՝ մենք այլ սանկցիաներ կկիրառենք ձեր օդանավերի հանդեպ։ Բայց Հայաստանը ոչ օդանավեր ունի, ոչ էլ սեփական փոխադրող: Ու՞մ նկատմամբ պետք է սանկցիաներ կիրառեն անհասկանալի է: Այստեղ ՔԱԿ-ի մեղքն այն է, որ ինքը չի հետևել, թե նախկինում ինչ է կատարվել, չի տիրապետում ներհայաստանյան անցուդարձին: Իսկ պատկան մարմինները անտարբեր են այդ ոլորտի նկատմամբ:

«Ռայեն-էյր» բերել Հայաստան դա իր գործառույթի մեջ չի տեղավորվում։

Ավիաընկերությունների հետ պայմանագրեր կնքելը օդանավակայանի գործառույթն է: Մեղքն ավելի շատ նախկիններին է, որոնք կաշառքով ավիաընկերություններ են գրանցել, արտոնագրեր են տվել, օդաչուներին եւ զրո վերահսկողություն։ Կարծում եմ, քաղավիացիան պետք է նման արտոնագրեր ունեցողների նկատմամբ օրինական խիստ պահանջներ դնի, եթե նրանք շարունակեն նույն կերպ աշխատել, ապա պետք է նրանց զրկի կամ չեղարկի այդ արտոնագրերը»։

Դիտարկմանը, թե տարածված տեսակետ է, որ հայ օդաչուներն ամենալավն են, հնարավոր չէ՞, որ նրանք կարողանան աշխատանք գտնել օրինակ եվրոպական ավիաընկերություններում՝ Պետրոսյանն ասաց, որ սա էլ հերթական լեգենդներից մեկն է։ «Սնապարծություն է մտածելը, թե հայ օդաչուները լավ են մյուսների համեմատ։ Բոլորն էլ լավն են, եթե տիրապետում են իրենց աշխատանքին, անկախ ազգությունից։ Մենք չունենք համապատասխան տրենաժորները, որտե՞ղ պետք է մարզվեն, վերապատրաստվեն։

Մերը սովետական, հին սարք է։ Մերոնք, այո, փորձառու են, քանի որ նաեւ սովետական օդանավերի վրա թռել են, բայց դե, եթե այդ սարքրերն ունենայինք, օդաչուները մարզվեին որքան հարկն է՝ գուցե Սոչիի դեպքը չլիներ։ Դա ուղղակի լեգենդ է»,-ասաց նա։