Ճգնաժամի պայմաններում հարկային կարգապահությունը պետք է էլ ավելի խստանա. վարչապետ

Ճգնաժամի պայմաններում հարկային կարգապահությունը պետք է էլ ավելի խստանա: Այս մասին այսօր՝ ապրիլի 2-ին կառավարության նիստում հայտարարեց ՀՀ վարչապետ Նիկոլ Փաշինյանը:

«Այն շրջիկ խոսակցությունը, որ մարդիկ չեն աշխատում, իսկ դուք հարկեր եք պահանջում, ուզում եմ նորից ընդգծել, որ հարկերը գոյանում են աշխատանքի, դրամաշրջանառության, դրամաշրջանառության, եկամուտների շրջանառության պարագայում: Այսինքն գործնականում հնարավոր չէ հարկեր հավաքել այն մարդկանցից, որոնք շրջանառություն եւ եկամուտներ չունեն: Իհարկե, կան նաեւ որոշակի հաստատագրված հարկերի տեսակներ, բայց նաեւ այդ հարկերի հավաքագրումն ապահովելու համար է, որ մենք լայն տնտեսական աջակցությանծրագրեր ենք իրականացնում:

Հարկային կարգապահությունը որեւէ ձեւով չպետք է թուլանա, առավել պետք է ուժեղանա, որովհետեւ առավել եւս ճգնաժամի պայմաններում բոլոր ոլորտներում կառավարության գործունեության արդյունավետությունը կախված է առկա բյուջետային միջոցներից»,-ընդգծեց վարչապետը:

Նա նաեւ հավելեց, որ ամեն ինչ պետք է անեն, որ 2020 թվականի բյուջեն կատարեն հնարավոր առավելագույն ծավալներով:

Ինչ վերաբերում է 2019-ի բյուջեին, ըստ Վարչապետի՝ վերջինիս եկամուտները առաջին եռամսյակի տվյալներով գերակատարվել են 8,9 մլրդ դրամի չափով: 

Նիկոլ Փաշինյանը նկատեց, որ այս տարվա առաջին եռամսյակի ցուցանիշները նախորդ տարվա առաջին եռամսյակի ցուցանիշներին գերազանցում են 49,5 մլրդ դրամով, կամ 16,5 տոկոսով:

«Այս ցուցանիշներն ավելի կընդգծվեն, եթե ասենք, որ 2018-ի առաջին եռամսյակի հարկային հավաքագրումների ցուցանիշները 2019-ի առաջին եռամսյակի ցուցանիշներից ավել են եղել 60,5 մլրդ դրամով կամ 25,3 տոկոսով:

Այսպիսով կարող ենք ասել, որ մենք ճգնաժամի եզրին փաստորեն բավականին լուրջ գերակատարումներ ենք ունեցել եւ 2018-ի համեմատությամբ, 2020-ի առաջին եռամսյակում բյուջեի եկամուտները ավելացրել ենք ավելի քան 100 մլրդ դրամով»,-ասց վարչապետը:

Նա նկատեց, որ իհարկե, բոլորն էլ գիտակցում են, որ կորոնավիրուսի պատճառով դեռ անորոշություններ շատ կան. «Ակնհայտ է, որ մենք այդ տեմպերը կկորցնենք, բայց մեծ հաշվով 2019-ի եւ 2020-ի առաջին եռամսյակի տնտեսական տեմպերը վկայում են, որ կառավարության տնտեսական քաղաքականությունն արդյունավետ է, մենք տիրապետում ենք տնտեսության զարկերակին: Իհարկե, ստեղծվել է նոր իրավիճակ եւ ճգնաժամային իրավիճակում պետք է կարողանանք նույնքան արդյունավետ տնտեսական որոշումներ կայացնել»:

Փաշինյանը շնորհակալություն հայտնեց այն տնտեսվարողներին, որոնք պարտաճանաչ վճարում են իրենց հարկերը, նաեւ ՊԵԿ-ին՝ հարկերի հավաքագրման գործը հաջողությամբ իրականացնելու համար: