Ասվել է, որ Բաբելոնին հաղթել ենք, օրավարձով ապրող մարդուն Բաբելոնին հաղթելն ի՞նչ է տալիս. Մարուքյանը՝ Փաշինյանի մասին (Տեսանյութ)

Նոր ձեռնարկված ավելի խիստ միջոցառումներն, ըստ էության, շատ կարեւոր է, որ քաղաքացիները պահպանեն, բայց ես բազմաթիվ հարցեր ունեմ, որոնց պատասխանները չեն տրվում: Այս մասին, այսօր՝ մարտի 25-ին, ԱԺ-ում լրագրողների հետ զրույցում նշեց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

«Օրինակ, մարդիկ հարց են տալիս՝ հիմա մեր վարկերը չենք կարողանում վճարել, իրենք «սեւ ցուցակ» ընկնո՞ւմ են, թե չեն ընկնում: Ոչ մի բան չի ասվում մարդկանց: հաջորդը, որեւէ ձեւով լուծում եղա՞վ մարդկանց վարկերը հետաձգելու եւ հնարավորություն տալու, որ երբ տնտեսությունը կվերականգնվի, այն ժամանակ սկսեն վճարել: Որովհետեւ ասել՝ այս ամսվա տոկոսը մյուս ամիս կվճարես, երբ մարդն այս ամիս չի աշխատում, դա լուծում չէ:

Հաջորդը, օրավարձով աշխատողները՝ բանվորները, տաքսիստները, գեղեցկության սրահում աշխատողները, ռեստորաններում, սրճարաններում, հյուրատներում, հյուրանոցներում, տրանսպորտային շատ ոլորտներում աշխատող մարդիկ, որոնք ապրում են օրավարձով, հիմա սովի են մատնված: Այս մարդկանց ապրելու խնդիրը որեւէ ձեւով լուծվո՞ւմ է, թե՞ չի լուծվում»,-ասաց Մարուքյանը:

Դիտարկմանը, թե արդյոք կառավարության խոստացած 150 մլրդ դրամի աջակցությունը ճիշտ չի բաշխվում, նա պատասխանեց. «Աշխարհի որեւէ երկրում չկա այնպիսի վիճակ, որ մարդկանց ասեն նստեք տանը եւ նրանց հացի խնդիրը չլուծեն: Դրան գումարած կոմունալների վարձերն ուզում են: Համապատասխան ընկերություններից մարդկանց ասել են, որ գազն ու լույսը չեն անջատի, «Վեոլիա ջրից» դեռ տեղեկություն չկա, բայց պետք է այս հարցերին համալիր լուծումներ տրվեն»:

Մարուքյանը տեղեկացրեց, որ այս պահին Հայաստանի պետությունը, հարկատուների վճարած հարկերով Կենտրոնական բանկում ունի 377 մլրդ դրամ փող. «Դա մեր ժողովրդի փողն է: Հիմա գոնե այն թիրախային խմբին, որն օրավարձով էր ապրում, պետությունը պետք է աջակցի՞, թե ոչ: Որեւէ խոսք այդ մասին չկա: բոլորը լայվ են մտնում ու բացատրում, թե ոնց պետք է տնից դուրս չգան: Հասկացանք, բայց ո՞նց պետք է մարդիկ ապրեն: Տատիկ-պապիկներին ասվել է, որ ժամը 10-12-ը գնան խանութներ, որ մենք այդ ժամանակ իրենց չվարակենք, բայց ինչ-որ մեկը նրանց հարցրե՞լ է՝ իրենք փող ունե՞ն, որ գնան խանութ: Լուծումն այն է, որ այդ գումարներից թիրախային աջակցություն պետք է ցուցաբերվի:

Ասել, որ այդ գումարները կտանք բանկերին, բանկերը զրո տոկոսով վարկեր կտան, ում կտան, երբ կտան: Կամ որ տան, դա ի՞նչ կապ ունի օրավարձով աշխատող տաքսիստի կամ բանվորի հետ: Հիմա 7 օր այդ մարդիկ փող չեն ստանալու: Այս հարցերի վերաբերյալ կառավարությունը լուծում չի առաջարկում, ոչ մի բան այս մասին չի ասվել: Ասվել է՝ վազենք, ասվել է, որ Բաբելոնին հաղթել ենք: Հիմա օրավարձով ապրող մարդուն Բաբելոնին հաղթելն ի՞նչ է տալիս»,-ասաց ԼՀԿ ղեկավարը՝ նաեւ հարց բարձրացնելով, թե արդյոք կառավարությունը գիտի, թե քանի մարդ է այս օրերին մնացել անգործ: