«Մտածել են՝ մի բան կխաբենք, ընդունողն էլ չի հասկանա, կանցնի կգնա». Հակոբ Արշակյան (Տեսանյութ)
Բարձր տեխնոլոգիաների արդյունաբերության նախարար Հակոբ Արշակյանը Facebook-ի իր էջում ուղիղ եթերում պարզաբանումներ է ներկայացրել իրենց նախարարությունում 10 մլն դրամի առերեւույթ չարաշահումների վերաբերյալ, որի վերաբերյալ նախօրեին հաղորդագրություն էր տարածել Գլխավոր դատախազությունը:
Նա նշեց, որ իրենց նախարարությունում համակարգչային սարքավորումների եւ ցանցային սերվերների ձեռբերման համար հայտարարված է եղել մրցույթ: Մրցույթին մասնակցել են մի քանի ընկերություններ, որոնցից մեկը հաղթել է մրցույթը որոշակի գնով. «Այդ հաղթողը մատակարարել է համակարգչային սարքավորումները, որոնք որոշ ժամանակ անց պարզվել է, որ չեն համապատասխանում իրենց տեխնիկական բնութագրերին: Պարզվելուց անմիջապես հետո կազմվել է համապատասխան գրություն եւ իմ կողմից ուղարկվել է գլխավոր դատախազին: Տեղի են ունեցել համապատասխան գործողություններ եւ հարուցվել է նշված քրեական գործը»,-նշել է նախարարը:
Հակոբ Արշակյանը նկատեց, որ դեռ կան անբերախիղճ մատակարարներ, որոնք կարծում են, թե կարող են մատակարարել տեխնիկական առաջադրանքներին չհամապատասխանող պարանքներ ու ծառայություններ, եւ այդպես անցնի գնա. «Կամ հետո գան ասեն՝ դե, կարող ենք փոխարինել, մենք չէինք նկատել: Ուզում եմ ասել, որ տարբեր մակարդակներով խոսվել է սրա մասին՝ սկսած ճանապարհաշինությունից, տրանսպորտից: Նույնիսկ վարչապետի կողմից է խոսվել սրա մասին բազմիցս: Մեր քաղաքական թիմը հանդուրժող չի լինելու այսպիսի երեւույթների նկատմամբ:
Շատ կարեւոր է, որ հարցը վերաբերում է նաեւ ազնիվ տնտեսվարողներին շուկայից դուրս մղմանը: Ազնիվ տնտեսվարողը եւ ոչ այնքան ազնիվ տնտեսվարող սուբյեկտը մասնակցում են մրցույթին, մեկը տալիս է նորմալ գին, մյուսը տալիս է ավելի էժան գին՝ մտածելով, թե չիպի մեջի պարամետրը մի բան կխաբենք, ընդունողն էլ չի հասկանա, կանցնի կգնա»,-ընդգծեց նախարարը՝ հավելելով, որ այդ ամենի արդյունքում նախ նախարարությունը չի ստանում այն, ինչ նախատեսել էր ստանալ, երկրորդ, անազնիվ տնտեսվարողը ստանում է առավելություն եւ գումար է ստանում, եւ երրորդ, ազնիվ տնտեսվարողը պարտվում ու տուժում է:
Հակոբ Արշակյանը հույս հայտնեց, որ ամեն բան կպարզվի եւ մեղավորները կպատժվեն:
Հիշեցնենք, ավելի վաղ հայտնել էինք, որ Պետական շահերի պաշտպանության հայց հարուցելու գործառույթի շրջանակներում ՀՀ գլխավոր դատախազությունում ուսումնասիրվել է ՀՀ բարձր տեխնոլոգիական արդյունաբերության նախարարության կողմից համակարգչային սարքավորումների ձեռքբերման եւ ցանցային սերվերների ձեռբերման վերաբերյալ նախարարի ուղեկցող գրությամբ ստացված փաստաթղթերը, որոնց արդյունքում պարզվել է առերեւույթ հանցավոր չարաշահման հանգամանք:
ՀՀ բարձր տեխնոլոգիական արդյունաբերության նախարարության կարիքների համար թվով 100 համակարգչային սարքավորումների եւ 2 ցանցային սերվերների ձեռքբերման նպատակով հայտարարված մրցույթների արդյունքում հաղթող ճանաչված ՍՊԸ-ի հետ 2019թ. դեկտեմբերին կնքվել է ապրանքների մատակարարման 2 պայմանագիր՝ 29.940.000 եւ 9.740.000 ՀՀ դրամ արժեքով:
Պայմանագրերի տեխնիկական բնութագրերով նախատեսված եւ փաստացի ձեռք բերված ապրանքների համապատասխանության վերաբերյալ նախարարության պատասխանատու անձի կողմից տրվել են դրական եզրակացություններ, կազմվել ապրանքների հանձնման-ընդունման ակտեր ու արձանագրություններ, որոնց հիման վրա ապրանքներն ընդունվել են:
Հետագայում պարզվել է, որ մատակարարված համակարգչային սարքավորումները չեն համապատասխանում պայմանագրերի տեխնիկական բնութագրերի պահանջներին: Մասնավորապես՝ պայմանագրի տեխնիկական բնութագրերով նախատեսված տաք փոխարինման հնարավորությամբ սերվերների փոխարեն մատակարարվել են այլ մոդելի սերվերներ, որոնք արտադրողի կողմից ներկայացվում են որպես սպառողական նպատակների համար նախատեսված արտադրանք եւ չունեն տաք փոխարինման հնարավորություն: Բացի այդ, պայմանագրի տեխնիկական բնութագրերով նախատեսված լազերային մկնիկների փոխարեն մատակարարվել են օպտիկական մկնիկներ:
Պարզվել է, որ փաստացի մատակարարված եւ ընդունված ցանցային սերվերների գինը ավելի ցածր է պայմանագրերով նախատեսված սարքավորումների գներից:
Փաստորեն, ՀՀ բարձր տեխնոլոգիական արդյունաբերության նախարարության պատասխանատու պաշտոնատար անձինք իրենց պաշտոնեական դիրքը ծառայության շահերին հակառակ օգտագործելով՝ շահադիտական, անձնական այլ շահագրգռվածությունից կամ խմբային շահերից ելնելով, համակարգչային սարքավորումների մատակարարման պայմանագրերի հանձնման-ընդունման փաստաթղթերում եւ իրենց կողմից կազմված եզրակացություններում մտցրել են պայմանագրերի տեխնիկական բնութագրերին չհամապատասխանող ապրանքների՝ նախատեսված պահանջներին համապատասխանության վերաբերյալ ակնհայտ կեղծ տվյալներ, ընդունել այդ ապրանքները:
Դրա հետեւանքով պետության իրավունքներին եւ օրինական շահերին պատճառվել է 9.740.000 ՀՀ դրամի էական վնաս: