ՆԱՏՕ-ն ստուգում է կորոնավիրուսի առկայությունն արտերկրում տեղակայված իր զինվորականների մոտ

Պանդեմիայի ֆոնին Դաշինքը ստուգում է կորոնավիրուսի առկայությունն իր զինվորականների մոտ, որոնք ներգրավված են ՆԱՏՕ-ի առաքելություններին արտասահմանում, այդ թվում` Աֆղանստանում և Կոսովոյում: Այս մասին երկուշաբթի հայտարարել է ՆԱՏՕ-ի մամուլի ծառայությունը, փոխանցում է ՏԱՍՍ-ը:

«ՆԱՏՕ-ն, միջազգային այլ կազմակերպությունների հետ միասին, ուշադիր հետևում է կորոնավիրուսի բռնկմանը (COVID-19), եւ ՆԱՏՕ-ի բոլոր երկրները կանխարգելիչ միջոցառումներ են ձեռնարկում: ՆԱՏՕ-ի ռազմաբժշկական անձնակազմը շարունակում է զգոն մնալ` հետևելով օպերացիաների շրջանակներում տեղակայված ՆԱՏՕ-ի անձնակազմի վրա պոտենցիալ ազդեցություններին»,- նշվում է մամուլի ծառայության հաղորդագրության մեջ:

Ներկայումս ՆԱՏՕ-ի ամենամեծ առաքելությունները գտնվում են Աֆղանստանում` մոտ 16.000 մարդ, և KFOR առաքելությունը` Կոսովոյում:

ՆԱՏՕ-ի բրյուսելյան գրասենյակում հայտնաբերվել է վարակման երեք դեպք, անձնակազմի զգալի մասն այժմ աշխատում է տնային ռեժիմով, բոլոր արտաքին այցելությունների համար, այդ թվում`լրագրողների համար, դաշինքի շտաբը փակ է:

Ինչ վերաբերում է ՆԱՏՕ-ի արձագանքին վարակի` աշխարհի ամենամեծ օջախով երկրին` Իտալիային, ապա դաշինքի գլխավոր քարտուղար Յենս Ստոլտենբերգը երկուշաբթի Twitter-ում գրել է. «ՆԱՏՕ-ն ուս ուսի տված կանգնած է Իտալիայի կողքին: Հաջորդ քայլերը մենք կքննարկենք ապրիլին նախատեսված արտաքին գործերի նախարարների հանդիպմանը»: Իտալական լրատվամիջոցներին տված հարցազրույցում նա նաեւ հայտարարել էր, որ ՆԱՏՕ-ն «երաշխավորում է ոչ միայն ռազմական, այլեւ սանիտարական անվտանգությունը», սակայն որևէ կոնկրետ բան չի ասել դաշինքի և դրա անդամ երկրների կողմից Իտալիային հնարավոր աջակցության վերաբերյալ: