«Մեր կյանքը 360 աստիճանով շրջված է». Աննա Հակոբյանը կորոնավիրուսի կանխարգելման մասին բուկլետներ է բաժանել
ՀՀ վարչապետ Նիկոլ Փաշինյանի տիկին Աննա Հակոբյանն այսօր` մարտի 23-ին, Կառավարության շենքի մոտից կորոնավիրուսի կանխարգելման մասին բուկլետներ է բաժանել քաղաքացիներին: Նա լրագրողների հետ զրույցում ասել է, որ ինքը կամավոր որոշել է օգնել Առողջապահության նախարարությանը:
«Առողջապահության նախարարության կողմից արվեց հայտարարություն, որ այդ արհավիրքը դիմակայելու համար անհրաժեշտ են կամավորներ` տարբեր ոլորտներում: Մենք անմիջապես դիմեցինք, որովհետև, պայմանավորված արտակարգ դրությամբ, այլ երկների հետ շփումների սահմանափակման`նաև իմ գործունեությունն է դադարել որպես վարչապետի տիկին, բոլոր ծրագրերը հետաձգվել են, շփումները սահմանափակվել են: Որոշեցի կամավոր գրվել և իմ լուման ներդնել, օգտակար լինել այնտեղ, որտեղ դրա կարիքը կա: Նախարարությունից հայտնեցին, որ մեծ թվով կամավորներ կան եւ փորձեցին հեռու պահել ինձ, մտածելով, գուցե չարժե, սակայն մենք պնդեցինք, որ այդպես հնարավոր չէ, ես պետք է անպայման ինչ-որ բանով օգտակար լինեմ»,- ասաց վարչապետի տիկինը:
Նա շեշտեց, որ բուկլետները տարածելու խնդիր կա եւ իր դեմքով տարածելն առաջին հերթին կարեւոր է. «Բուկլետն այն մասին է, թե ինչ պետք է անել այս պայմաններում, ինչպես մեկուսանալ եւ այլն: Ես հաճույքով այն կբաժանեմ մարդկանց, կմաղթեմ առողջություն և խորհուրդ կտամ հետևել այն հրահանգներին, որոնք տալիս են պատկան մարմինները»:
Լրագրողի դիտարկմանը, որը տարածություն պահպանելու խնդիր կարող է առաջանալ, քանի որ քաղաքացիները կցանկանան իր հետ նկարվել, Աննա Հակոբյանն ասաց. «Չեմ կարծում, որովհետև այսօր առաջին օրն է, որ ես դուրս եմ եկել այս ինքնամեկուսացումից հետո: Մի անգամ եմ վարչապետի հետ խանութ գնացել ու վերադարձել տուն: Այսօր մի պահ քայլեցի փողոցում, տեսա, որ բոլորը շատ ուշադիր են, գրկախառնության փորձեր չեղան: Հեռավորությունը պահպանելով` առողջություն էինք մաղթում»:
Հարցին` ինչպիսի՞ կանխարգելիչ միջոցառումներ է ինքն իրականացնում այս օրերին, վարչապետի տիկինն ասաց. «Բոլոր այն միջոցները, ինչի մասին հայտարարում ենք... ինչպես հայտնի է գնացել էինք Սևան, այնտեղից այդ ամենը թեժացավ, Սևանից Երևան վերադառնալուց հետո տանից ուղղակի դուրս չենք եկել: Ախտահանիչ միջոցներն ենք օգտագործում: Մեր առօրյան կազմակերպում ենք տանը, որը բավականին դժվար է»:
Հարցին` խմբագիրները բողոքում են, որ պարետատունը ստիպում է լրատվամիջոցներին և անհատներին հեռացնել նյութերը կապված կորոնվաիրուսի տարածման հետ և ինքը արդյոք դա չի՞ դիտարկում խոսքի ազատության սահմանափակում, Հակոբյանն ասաց. «Սխալված չեմ լինի, եթե ասեմ, որ մեր կյանքը 360 աստիճանով շրջված է: Մեր կյանքի բնականոն ընթացքը գոյություն չունի այլևս: Բոլոր այդ հարցադրումները կարծես նախորդ կյանքից լինեն: Մինիմալ հոգեբանական տրավմաներով պետք է մեր ժողովուրդը դուրս գա այս իրավիճակից: Դրան են միտված նաև այդ սահմանափակումները: Մենք հիմա ինչ-որ միջանկյալ տարածությունում ենք և գնում ենք դեպի ապագան: Վտանգներ չեմ տեսնում և հույս ունեմ, որ բոլորն ըմբռնումներով կմոտենան այդ հարցերին»: