Վրաստանում արգելել են հարսանիքներն ու հոգեհանգիստները
Վրաստանում, արտակարգ դրության հետ կապված, արգելել են կատարել հոգեհանգստյան, ինչպես նաեւ հարսանեկան եւ այլ արարողություններ, որոնք ենթադրում են մարդկանց կուտակում հասարակական վայրերում։ Համապատասխան որոշումն ընդունել է Վրաստանի կառավարությունը։
Երկրում արտակարգ իրավիճակի հետ կապված նոր կանոնների համաձայն, արգելվում են ցանկացած սոցիալական միջոցառումներ, որոնք ավելի քան տասը մարդու հավաք են ենթադրում, հայտնում է «Նովոստի-Գրուզիան»։
Սահմանափակումը չի վերաբերում մարդկանց հավաքին բուժական եւ հանրային հաստատություններում, պաշտպանական ուժերում, հատուկ քրեակատարողական հիմնարկներում, իրավապահ մարմիններում, որոնք պետք է կատարեն իրենց պարտականությունները։
Սահմանափակումը նաեւ չի վերաբերում հասարակական տրանսպորտին եւ ենթակառուցվածքային շինարարական աշխատանքներին։
Որոշման մեջ նաեւ նշվում է, որ այն մասնավոր հաստատություններում, որոնց վրա սահմանափակումները չեն տարածվում, մարդիկ պետք է երկու մետր դիստանցիա պահեն։
Այսպիսի որոշում կայացվել է այն բանից հետո, երբ չնայած իշխանությունների կոչերին, քաղաքացիների որոշ մասը շարունակել է մասնակցել հոգեհանգիստների, հյուրերի մասնակցությամբ նշել ծննդյան օրեր։
Այսօր սոցցանցերի օգտատերերի վրդովմունքն է առաջացրել տեսանյութը, որտեղ երեւում է, թե ինչպես են Մառնեուլի բնակիչները փորձում փողոցում խրախճանք կազմակերպել։ Արդյունքում ոստիկանությունը ստիպված է եղել միջամտել։