Մետրոյի ուղևորների քանակը հինգ անգամ կրճատվել է. փոխքաղաքապետ (Տեսանյութ)
Չկա մի թաղամաս, որը զրկվել է տրանսպորտից, ամեն տեղ էլ կա տրանսպորտ պարզապես քանակը սակավել է։ Այս մասին այսօր՝ մարտի 21–ին, լրագրողների հետ հանդիպման ժամանկ ասաց Երեւանի քաղաքապետի տեղակալ Սերգեյ Հարությունյանը՝ պատասխանելով լրագրողի այն հարցին, որ երթուղայինների վարորդները հիմանակոնում 60–70 տարեկան են եւ այս օրերին նրանք մեկուսացել են տներում եւ մի շարք թաղամասերում տրանսպորտի հետ կապված խնդիրներ են առաջացել։ Ի՞նչ է արվում տրանսպորտազուրկ թաղամասերի խնդիրն առաջիկայում լուծելու համար։
Նրա խոսքով՝ այսօր տրանսպորտում ուղեւորների քանակը քիչ է եւ բնականաբար տրանսպորտի շարժակազմն էլ է քիչ։ Հարությունյանը ներկայացրեց նաեւ թվեր. «Եթե Մետրոպոլիտենն ունենում էր օրեկան շուրջ 75 հազար ուղեւորափոխադրում, այս պահին ունենում է 15 հազար, մոտավորապես 5 անգամ մետրոյի ուղեւորների քանակն է կրճատվել։ Նույնկերպ ավտոբուսներում, նախկինում 70 հազար էր, հիմա 20 հազար ուղուր է օրական։ Մինչ այս 850–900 միկրոավտոբուս էր դուրս գալիս երթուղի, այս պահին դուրս են գալիս 500–ը։ Բնականաբար բոլոր այն վարորդները, որոնք պարետատան եւ Առողջապահության նախարարության ցուցումով ցանկալի չէ, որ աշխատեն, նրանք 60–ն անց մարդիկ են կամ ունեն խրոնիկ հիվանդություններ՝ շաքարային դիաբետ կամ սրտանոթային հիվանդություն, այդ մարդիկ տանն են, չեն աշխատում։ Այստեղ նաեւ ստեղծվում է փոքրիկ ծանրաբեռնվածություն այդ կազմակերպությունների վրա, որոնք իրականացնում են ուղեւորափոխադրում»։
Այս թեմայի վերաբերյալ Հարությունյանը խոսեց նաեւ ֆեյսբուքում իր տեսած գրառումների մասին. «Ֆեյսբուքում տեսա, որ մեր քաղաքացիները նաեւ ավել վճարում են մեր վարորդներին, որոնք այս օրերին իրականացնում են աշխատանքներ»։
Երեւանի քաղաքապետի մամուլի խոսնակ Հակոբ Կարապետյանը հավելեց, որ մասնավոր ուղեւրափոխադրում իրականացնող մի շարք ընկերություններ վերանայել են վարորդների կողմից վճարումները. «Մասնավոր ուղեւրափոխադրում իրականացնող մի շարք ընկերություններ որոշակի փոփոխություններ են կատարել վարորդներից ստացվող «պլանի» հարցում եւ նվազեցրել են այդ տուրքերը։ Տեղյակ եմ նաեւ, որ քաղաքապետարանը եւ կառավարական մարմինները քննարկումներ են անցկացնում նաեւ որոշակի այլ տուրքերի վերանայման հետ կապված»։
Փոխքաղաքապետը եւս մեկ անգամ տեղեկացրեց, որ քաղաքային տրանսպորտում ախտահանման աշխատանքներ կատարվում են։