Մարտի 21-ից դադարեցվելու են դեպի Վրաստան բոլոր ավիաչվերթները

Մարտի 21-ից դադարեցվելու են դեպի Վրաստան բոլոր ավիաչվերթները, երկրի օդանավակայանները ընդունելու են միայն հատուկ չվերթները: Այս մասին Վրաստանի կառավարության մամուլի խոսնակ Իրակլի Չիկովանին հայտնել է նոր կորոնավիրուսի դեմ պայքարի եւ տարածման կանխման հարցերով միջգերատեսչական համակարգող խորհրդի հերթական նիստի արդյունքներով, փոխանցում է «Նովոստի-Գրուզիան»:

«Որոշում է ընդունվել, որ վաղվանից ավիահաղորդակցությունն ամբողջությամբ դադարեցվում է, եւ իրականացվում են միայն այն ավիաչվերթները, որոնք կատարում է «Վրացական ավիաուղիները» եւ համակարգվում է Վրաստանի կառավարության կողմից»,- հայտարարել է Չիկովանին:

Նա հավելել է, որ վաղվանից 2 շաբաթ կարանտինային գոտիներում պետք է անցկացնեն Վրաստանի բոլոր քաղաքացիները, որոնք հայրենիք կվերադառնան հատուկ չվերթներով:

«Մենք մի քանի օր առաջ որոշում ընդունեցինք այն մասին, որ մեր երկիր են ժամանում միայն մեր քաղաքացիները: Վրաստան ժամանող բոլոր մարդիկ՝ անկախ այն հանգամանքից, թե որտեղից են ժամանում, տեղափոխվելու են կարանտինայի գոտիներ եւ լինելու են բժիշկների հսկողության տակ, նրանց վերաբերյալ որոշումներ կընդունվեն՝ համապատասխան միջամտությունները հաշվի առնելով»,- հայտնել է Չիկովանին:

Կարանտինային գոտիներ կկառուցեն նաեւ Թուրքիայի, Ռուսաստանի եւ Ադրբեջանի սահմանային անցակետերում՝ «Սարփիում», «Կարմիր կամրջում», «Վերին Լարսում»:

Վրաստանը մարտի 18-ից 2 շաբաթով իր սահմանները փակել է օտարերկրյա քաղաքացիների համար: Տեղաշարժման արգելք է գործում հարեւանների հետ Վրաստանի սահմաններին՝ Ադրբեջանի, Հայաստանի, Ռուսաստանի եւ մասամբ Թուրքիայի: Այս սահմանափակումը չի տարածվում բեռնափոխադրումների վրա:

Մինչեւ հիմա կարանտինային գոտիներում էին տեղավորում այն մարդկանց, որոնք ժամանում էին Covid-2019 կորոնավիրուսի անբարենպաստ իրավիճակով երկրներից: Դրանք էին՝ Չինաստանը, Հարավային Կորեան, Իրանը, Իտալիան, Ֆրանսիան, Գերմանիան, Ավստրիան, Իսպանիան, Շվեյցարիան, Նորվեգիան եւ Դանիան: Այլ երկրներում եղած քաղաքացիներին նշանակվում էր ինքնամեկուսացման ռեժիմ:

Վրաստանում կորոնավիրուսի հաստատված դեպքերի թիվը այսօրվա դրությամբ կազմում է 43: Կարանտինի մեջ է 1925 մարդ, իսկ 270-ից ավելին ստացիոնարներում է բժիշկների հսկողության տակ: