Հայաստանի «վայ քաղաքական գործիչներին»՝ Մի՛ սրեք Ղարաբաղի իրավիճակը. Արայիկ Հարությունյան
Ստեղծված իրավիճակը կարելի է անվանել ոչ թե ճգնաժամ, այլ աղետ, քանի որ նավթի գներն այսօր կրկնակի նվազել են։ Այս մասին մարտի 19–ին, ֆեյսբուքյան ուղիղ եթերում ասաց Արցախի նախագահի թեկնածու Արայիկ Հարությունյանն՝ անդրադառնալով նոր կորոնավիրուսի տարածմամբ պայմանավորված տնտեսական իրավիճակին։
«Բարելն այսօր արժե 25 դոլար այն պարագայում, երբ 2 ամիս առաջ 60 դոլարի շուրջ էր տատանվում։ Իհարկե բոլոր իրավիճակներում մենք պետք է կարողանանք սթափ գնահատել»,– ասաց Հարությունյանը:
Անդրադառնալով վարչապետ Նիկոլ Փաշինյանի՝ երեկ «Շանթ» հեռուստաընկերության հետ հարցազրույցին, ասաց, որ այն բավական ոգեւորիչ էր. «Այսպիսի իրավիճակներում կառավարությունը պետք է անհապաղ ագրեսիվ քայլեր ձեռնարկի։ Իրականում այն ոչ թե ճգնաժամ, այլ տնտեսական աղետ է դառնալու մոլորակի վրա։ Ողջունում եմ ՀՀ կառավարության գործունեությունը, որ անհապաղ նախանշված քայլեր ունեն եւ ամենակարեւորը, որ հիմնական ուղղությունը լինելու է գյուղատնտեսությունը, քանի որ այն կարեւոր է ե՛ւ պարենային անվտանգության խնդրի լուծման ուղղությամբ, ե՛ւ արագ զարգացող է եւ ամենակարեւորը աշխատատեղերի ստեղծման հետ է կապված»։
Հարությունյանի խոսքով՝ Արցախը եւս պետք է քայլեր ձեռնարկի Հայաստանի հետ միասին. «Սա հերթական ապացույցն է, որ տարանջատված իշխանություններ չպետք է ունենանք, մենք ունենք միասնական հայրենիք, մեր աշխատանքները պետք է լինեն միասնական եւ Արցախն էլ առանց Հայաստանի իշխանությունների օժանդակության չի կարող գոյատեւել, քանի որ առկա է պղնձի գների անկում եւ այլն, այստեղ պետք է ընդհանուր քաղաքական տնտեսական ծրագրով առաջնորդվել»։
Հարությունյանի խոսքով՝ կապված նավթի գների կտրուկ նվազման հետ, եթե մենք ունենք խնդիրներ հիմնականում Ռուսաստանից կատարվող փոխանցումների հետ, ապա Ադրբեջանը ծայրահեղ ֆինանսական վիճակում է հայտնվում. «Մեր թշնամին, հակառակորդ Ադրբեջանը ծայրահեղ ֆինանսական վիճակում է գտնվելու, եթե շարունակի նավթի գների այս անկումը։ Այն ստիպելու է Ադրբեջանին երկար մտածելու՝ արդյոք այս սպառազինության մրցավազքը անհրաժեշտ է իրեն, թե ոչ, եւ համոզված եմ, ամիսների ընթացքում խելքը գլուխներն են հավաքելու եւ փորձելու են կոմպրոմիսային խնդիրների լուծման ուղղությամբ բանակցություններ վարել, հատկապես, երբ ունեցավ սոցիալական աղետալի վիճակ՝ ավելի սթափ կմտածեն»։
Եզրափակելով խոսքը, Հարությունյանը խոսեց նաեւ նախընտրական քարոզարշավի առիթով բորբոքված քաղաքական կրքերին. «Տարբեր լրատվամիջոցներ փորձում են Արցախում սրել իրավիճակը։ Ես կխնդրեմ Հայաստանի լրատվությանը եւ Հայաստանի «վայ քաղաքական գործիչներին»՝ հեռու մնացեք Ղարաբաղի քաղաքական իրավիճակից, մի սրեք Ղարաբաղի իրավիճակը։ Մենք գտնվում ենք շատ ծայրահեղ վիճակում, պառակտված երկրով մենք չենք կարողանալու հաղթահարել այս ամենը, թողեք մենք իրար հետ լեզու կգտնենք, թեկնածուներով, քաղաքական պրոցեսներով, ամեն ինչ հարթ կընթանա եւ ապրիլի 1–ին մենք կունենանք ավելի համերաշխ հասարակություն եւ հնարավորություն կունենանք այս բարդ իրավիճակում հաղթահարել, իհարկե կարեւորելով ՀՀ իշխանությունների հետ ներդաշնակ աշխատանքը։ Այս փորձությունից մենք կարող ենք դուրս գալ միայն միասնական ճակատով։ Ձեռք-ձեռքի բռնած ներդաշնակ աշխատանքով»։