Ֆրանսիան կարող է երկարաձգել երկշաբաթյա մեկուսացման ռեժիմը

Ֆրանսիան կարող է երկարաձգել երկշաբաթյա մեկուսացման ռեժիմը, եթե կորոնավիրուսի տարածման սպառնալիքը շարունակվի, հայտնում է Reuters- ը` վկայակոչելով կառավարությունը:

Երբ նախագահ Էմանուել Մակրոնը երկուշաբթի Ֆրանսիայում հայտարարեց աննախադեպ մեկուսացման ռեժիմի մասին, ներքին գործերի նախարարն ասաց, որ անհրաժեշտության դեպքում կառավարությունն առանց հապաղելու կերկարաձգի խիստ սահմանափակումները:

«Մենք միայն մի նպատակ ունենք՝ հաղթել COVID-19-ի դեմ պատերազմում»,- ասել է նախարար Քրիստոֆ Քաստաները «Ռադիո Եվրոպա 1»-ին տված հարցազրույցում:

Հայտարարված կարանտինն ամբողջ Ֆրանսիայով ապահովում է շուրջ 100.000 ոստիկան: Ֆրանսիացիներին թույլատրվում է լքել տունը միայն մթերքներ գնելու, աշխատանքի գնալու, սպորտով զբաղվելու կամ բժշկական օգնության դիմելու համար:

Փողոց դուրս եկած յուրաքանչյուր մարդ պետք է փաստաթուղթ ունենա, որն արդարացնում է նրա տեղաշարժը, հակառակ դեպքում տուգանք կկիրառվի: Քաստաների խոսքով` անցած 24 ժամվա ընթացքում տասնյակ հազարավոր ոստիկանական ստուգումներ են իրականացվել եւ շուրջ 4000 տուգանք է կիրառվել:

«Կանոններն անտեսելը հերոսություն չէ»,- ասել է Քաստաները:

Հինգշաբթի օրը Մակրոնն ու նրա կառավարությունը ուժեղ ճնշման ենթարկվեցին բժիշկների, ոստիկանության եւ հասարակության կողմից` դիմակների, ձեռնոցների եւ այլ պաշտպանիչ միջոցների պակասի պատճառով: