Ֆրանսիայում կարանտինի կանոնների խախտման համար առավելագույն տուգանքը կազմում է 375 եվրո
Ֆրանսիայում տեղաշարժման սահմանափակումների խախտման համար տուգանքը կարող է բարձրացվել մինչեւ 375 եվրո վճարման ժամկետները խախտելու դեպքում: Կարանտինի կանոններին չհետեւելու համար պատիժ սահմանող հրամանը հրապարակվել է պետական պաշտոնական «Ժուռնալ օֆիսյել» տեղեկատուում:
«Հրամանը չորրորդ աստիճանի տուգանք է սահմանում հաստատված պարտավորությունների արգելքի խախտման կամ շեղման դեպքում: Ֆիքսված տուգանքը եւ մեծացված ֆիքսված տուգանքը կազմում են համապատասխանաբար՝ 135 եւ 375 եվրո»,- նշված է որոշման մեջ: Նշվում է, որ տուգանքը կարող է մեծացվել մինչեւ 375 եվրո այն օրենքով սահմանված 45 օրում չվճարելու դեպքում: Ավելի վաղ ֆիքսված տուգանքի գումարը կազմում էր 38 եվրո, փոխանցում է ՏԱՍՍ-ը:
Ըստ ֆրանսիացի իրավապահների տվյալների՝ կարանտինի առաջին օրը Փարիզում եւ քաղաքի արվարձաններում ոստիկանությունը կատարել է գրեթե 8 հազար ստուգում: Երեք ձեռնարկությունների ղեկավարություն տուգանվել է սահմանված կանոններին չհետեւելու համար:
Ֆրանսիայի ՆԳՆ տվյալներով՝ երկրի տարածքում մոտ 100 հազար ժանդարմ եւ ոստիկան է ներգրավված ստուգումներ անցկացնելու նպատակով փողոցներում պարեկելու համար:
Ֆրանսիայում մարտի 17-ից գործում են երկրում քաղաքացիների տեղաշարժման սահմանափակումներ: Բնակիչներին կարգադրված է փողոցներով տեղաշարժը նվազագույնի հասցնել: Անհետաձգելի գործերով, այդ թվում՝ սննդամթերք եւ դեղեր գնելու, հեռավար ռեժիմով աշխատելու անհնարինության դեպքում աշխատանքի ուղեւորվելու եւ բժշկին այցելելու համար պահանջվում է ունենալ լրացված դիմում, որում նշված են տանից դուրս գալու նպատակը եւ նշանակման վայրը:
Ֆրանսիայի Առողջապահության գործակալության վերջին տեղեկությունների համաձայն՝ երկրում նոր տեսակի կորոնավիրուսով վարակման դեպքերի թիվը կազմում է 7730, որից մահվան ելքով՝ 175: Վերջին օրում վարակվածների թիվն աճել է 1097-ով, իսկ մահվան դեպքերը՝ 27-ով: