Վրաստանում մտադիր են կորոնավիրուսի «ագրեսիվ թեստավորում» անցկացնել

Վրաստանը մտադիր է կորոնավիրուսի արագ հայտնաբերման թեստեր ներմուծել: Այս մասին հայտարարել է երկրի առողջապահության փոխնախարար Թամար Գաբունիան, հաղորդում է «Նովոստի Գրուզիա»-ն:

Նրա խոսքով՝ Վրաստանը տվյալ մեթոդը կիրառած երկրներից որոշակի հանձնարարականների է սպասում:

«Այդ առումով հետաքրքիր է Հարավային Կորեայի փորձը: Հաճախ բարձր ջերմաստիճանը գրիպի կամ մասնագետների հայտնի այլ վիրուսների հետեւանք է: Հենց նման դեպքեր են արագ թեստերն արդյունավետ, եւ դրանք թույլ են տալիս խուսափել անիմաստ հոսպիտալացումից»,- նշել է Գաբունիան:

Առողջապահության նախարար Եկատերինա Տիկարաձեն եւս հաստատել է, որ արդեն այս շաբաթվա վերջ Վրաստանը հնարավորություն կունենա «ագրեսիվ թեստավորում» անցկացնել:

«Մենք հանձնարարականներ ենք ստացել Առողջապահության համաշխարհային կազմակերպությունից՝ այդ թեստավորումը մեր բնակչության շրջանում անցկացնելու համար: Անցած շաբաթ մենք սկսել ենք բանակցությունները այդ մեթոդը կիրառած երկրների հետ: Այդ ուղղությամբ լավագույն փորձն ունի Չինաստանը»,- ասել է Տիկարաձեն:

Հիշեցնենք, որ կորոնավիրուսը բռնկվել է 2019 թվականի վերջին Չինաստանի Հուբեյ նահանգի Ուհան քաղաքում: Դրանից հետո այն տարածվել է աշխարհի ավելի քան 160 երկրներում: Մասնագետները վիրուսն անվանել են COVID-19:

Մարտին ԱՀԿ-ն խոստովանել է, որ հիվանդությունը վերածվել է պանդեմիայի: Աշխարհում գրանցվել է վարակման 194000 եւ մահվան 7800 դեպքեր, ավելի քան 81000 պացիենտ ապաքինվել է:

Վարակման եւ մահվան դեպքերի մեծ մասը Չինաստանում են, որին հետեւում են Իտալիան եւ Իրանը: