Վաշինգտոնում հայտարարել են կորոնավիրուսի հետ կապված ապատեղեկատվական արտասահմանյան քարոզչության մասին
Թրամփի վարչակազմը հաստատում է, որ ներկայում կորոնավիրուսի հետ կապված ապատեղեկատվական արտասահմանյան քարոզչություն է իրականացվում, որն ուղղված է կորոնավիրուսի համավարակի պայմաններում երկրում վախի տարածմանը, հայտնում է AP-ը՝ հղում կատարելով ամերիկյան պաշտոնյաներին։
Ազգային անվտանգության ներկայացուցիչները հայտնել են, որ տեղի է ունեցել կիբեռ-միջադեպ՝ կապված Առողջապահության եւ սոցիալական ծառայությունների վարչության ցանցերի հետ, սակայն այժմ ցանցերը նորմալ են աշխատում։ Նրանք չեն մանրամասնել միջադեպի ծավալը։
Նախօրեին պաշտոնյաները դիմակայել են նրան, ինչը, նրանց խոսքերով, արտասահմանյան անձի կողմից համազգային կարանտինի հետ կապված վախ սերմանելու կանխամտածված փորձ է եղել։ ԱՄՆ երեք պաշտոնատար անձինք չեն անվանել արտասահմանյան ընկերությունը, որին դրանում պատասխանատու են համարում։ Նրանք ասել են, թե, հաշվի առնելով հարցի նրբությունը, չեն ուզում իրենց անունը եւս հրապարակվի։
«Տեքստային հաղորդագրությունների տեսքով ազգային կարանտինի մասին լուրերը սուտ են»,- կիրակի ուշ երեկոյան Twitter-ում գրել էր Ազգային անվտանգության խորհուրդը՝ կոչ անելով ամերիկացիներին հետեւել կառավարության պաշտոնական ցուցումներին։